मुख्यमंत्री ह कई क्षेत्र मन म उत्कृष्ट योगदान देवइया महिला मन ल करिन सम्मानित
रायपुर, 08 मार्च 2020। मुख्यमंत्री श्री भूपेश बघेल काली संझा राजधानी रायपुर म इंडिया टुडे कोति ले अंतर्राष्ट्रीय महिला दिवस के पूर्व संध्या म आयोजित महिला सम्मेलन अउ सम्मान समारोह म सामिल होइन। उमन ए अवसर म कई क्षेत्र मन म उत्कृष्ट योगदान देवइया प्रदेश के छै महिला मन ल सम्मानित करिन।
मुख्यमंत्री श्री बघेल ह समारोह ल सम्बोधित करत कहिन कि समाज म महिला मन के उत्थान के बिना पूरा विकास के कल्पना नइ करे जा सकय। समाज म कोनो युग म जब-जब नारी के अवहेलना होए हे, तब तब ओ युग म समाज ह पतन के गर्त म चल देहे हे। ए मातृ शक्ति के बिना कोनो समाज के पूरा विकास होना संभव नइ हे। उमन आधुनिक युग म देश अऊ प्रदेश के तरक्की अउ आजादी म महिला मन के योगदान के बारे म विशेष रूप ले उल्लेख करते ऊंखर पुरूष मन के खाँध ले खाँध जोर के करे गए संघर्ष ल सुरता करिन। ए तारतम्य म उमन आजादी के बाद देश के पहिली महिला प्रधानमंत्री श्रीमती इंदिरा गांधी के योगदान के घलोक उल्लेख करिन।
मुख्यमंत्री श्री बघेल ह कहिन कि छत्तीसगढ़ म विकास के हर क्षेत्र म महिला मन बढ़-चढ़कर हिस्सा लेवत हे। पाछु सवा साल ले छत्तीसगढ़ सरकार ह महिला मन के सम्मान ल अधिकार देके ओला मजबूत बनाय हे। एखर तहत राज्य म महिला सम्मान ल ऊंखर अधिकार अऊ स्वालम्बन ले जोड़े के रणनीति अपनाए गए हे।
एखर अवसर म मुख्यमंत्री श्री बघेल ह समाज के कई क्षेत्र मन म उत्कृष्ट काम करइया महिला मन ल सम्मानित करिन। एमां राजनीति के क्षेत्र म सुश्री सरोज पाण्डेय, उद्यमशीलता अऊ समाजिक उत्तरदायित्व के क्षेत्र म पद्मश्री फुलबासन बाई यादव, समाज सेवा के क्षेत्र म सुश्री तूलिका पांडे, खेल-कूद के क्षेत्र म सुश्री रेणुका यादव, प्रशासनिक क्षेत्र म आईपीएस नीतू कमल अऊ कला-संस्कृति के क्षेत्र म सुश्री अमृता तालुकदार ल सम्मानित करे गीस। ए अवसर म आभार प्रदर्शन इंडिया टुडे के संपादक श्री अंशुमान तिवारी ह करिस।
