दीदी ई-रिक्शा सहायता योजना ले आत्मनिर्भर बनिस भुनेश्वरी

एक लाख रूपिया के मिलीस अनुदान जीवन होइस खुशहाल
रायपुर, मुख्यमंत्री श्री विष्णु देव साय के अगुवई म श्रम विभाग कोति ले श्रमिक मन के हित म बहुत अकन प्रयास करे जात हे। इही कड़ी म रायपुर के मोवा म रहइया श्रीमती भुनेश्वरी साहू के जीवन म बदलाव आए हे। प्रधानमंत्री श्री नरेंद्र मोदी के सरकार ह ई-रिक्शा ल प्रोत्साहित करत हे काबर के ये प्रदूषण मुक्‍त अऊ सस्ता साधन ये। ई-रिक्शा ह आज महिला मन के जीवन म बड़का बदलाव तको लावत हे। एमा भरपूर सब्सिडी मिलत हे अऊ बैंक लिंकेज के लाभ तको मिलत हे। छत्तीसगढ़ म मुख्यमंत्री श्री विष्णुदेव साय के सरकार ह श्रम विभाग के योजना ले एला जोड़ देहे हे अऊ ये सोना म सुहागा साबित होवत हे।
भुनेश्वरी साहू पहिली रोजी-मजदूरी करके अपन परिवार के सहयोग करत रहिस। कम आय अऊ कठिन परिस्थिति म जीवन जीयत वो ह हार नइ माने रहिस। वोखर अंदर आत्मनिर्भर बने के इच्छा रहिस, जेन ल वो ह कभू खतम होए नइ दीस। आज भुनेश्वरी साहू अपन आत्मविश्वास, मेहनत अऊ छत्तीसगढ़ शासन के सहयोग ले समाज म एक सशक्त महिला के रूप म आगू आए हे। अब ओ ह अपन पांव म खड़े हे अऊ दूसर मन बर एक प्रेरणा बन गे हे।
डेढ़ साल पहिली वो ह ‘दीदी ई-रिक्शा योजना’ के तहत एक ई-रिक्शा बिसाईस अऊ ओला अपन आजीविका के साधन बना लीस। ए योजना के अंतर्गत छत्तीसगढ़ भवन अउ आन सन्निर्माण कर्मकार कल्याण मंडल कोति ले पंजीकृत महिला श्रमिक मन ल ई-रिक्शा बिसाए म 1 लाख रूपिया के सब्सिडी प्रदान करे जाथे। श्रीमती साहू ह ए योजना के लाभ उठात अपन स्वरोजगार स्थापित करिस अउ अपन मेहनत ले ये सिद्ध कर देखाइस के अवसर मिलय अऊ हौसला होवय, त महिला आत्मनिर्भर बन सकत हे।
वो ह अभी हाल म हरेक दिन 6 ले 8 घंटे ई-रिक्शा चलाथे अऊ वुही कमई ले अपन घर के खर्चा चलाय के संगें-संग अपन लइका मन ल पढ़ावत हे। ओ ह सरलग लोन के मासिक किश्त ईएमआई चुकावत हे अऊ भविष्य म अपन व्यवसाय के विस्तार के सपना देखत हे। वो ह कहत हे के मैं छत्तीसगढ़ सरकार अऊ मुख्यमंत्री श्री विष्णुदेव साय के आभारी हंव, जिंकर सोच अऊ योजना मन के सेती आज हम महिला मन मुख्यधारा ले जुड़के एक सम्मानजनक अऊ खुशहाल जीवन बितावत हन।