बिलासपुर, बिलासपुर म आयोजित जिला स्तरीय युवा महोत्सव के प्रमुख आकर्षण म पेण्ड्रा के आदिवासी महिला मन के गेड़ी नृत्य घलोक रहिस। ये महिला मन पेण्ड्रा के तीर-तखार के गांव झाबर, नवागांव आदि ले महोत्सव म संघरे बर इहां पहुंचे रहिन अऊ मंच म सधे अंदाज म उमन गेड़ी नृत्य प्रस्तुत करके दर्शक मन ल चकरित कर दीस। गेंड़ी नृत्य अब तक पुरूष मन ही करत रहिन। फेर ए महिला मन ह ये विधा म पुरूष मन के वर्चस्व ल तोड़ देहें हें। स्मार्ट आजीविका महिला संकुल संगठन नवागांव ले जुड़े स्व-सहायता समूह के ए महिला मन ह बताइन कि उमन विकासखंड स्तर म आयोजित युवा महोत्सव म सुआ अऊ गेड़ी नृत्य प्रस्तुत करके जिला स्तर के प्रतियोगिता म अपन स्थान बनाए हें।
काली उमन जिला स्तरीय महोत्सव म गेड़ी अऊ सुआ नृत्य के घलोक प्रदर्शन करिन। समूह के अध्यक्ष पार्वती चन्द्रा संग संगीता सलाम, विमला पुरी, संतोषी पैकरा, ललिता कुशराम, शांति देवी कंवर, उर्मिला श्याम, जयकुमारी जायसवाल आदि महिला मन ह युवा महोत्सव म उत्साह ले भागीदारी करिन। ए महिला मन ह बताइन कि अपन परंपरा अऊ संस्कृति ल आगू बढ़ाए बर उमन युवा महोत्सव म भाग लेहे हें। समूह के ये महिला मन कई ठन रोजगारमूलक गतिविधि मन म घलोक सक्रिय भागीदारी करत हें। एमन पेण्ड्रा के ग्राम नवागांव म नरवा, गरूवा, घुरूवा योजना अंतर्गत बने गौठान म वर्मी कम्पोस्ट खाद बनाए के काम हाथ म लेहे हें अऊ अभी 12 क्विंटल खाद बनाके एखर बिक्री करके आय प्राप्त करत हें। संगेच गौठान के चारागाह म उमन सब्जी उत्पादन के काम घलोक चालू करे हें। मछली पालन, बकरी पालन व्यवसाय के संगें-संग सेनेटरी नेपकिन विक्रय के काम घलोक ये महिला मन करत हें।
