गांव के महिला मन बनावत हें सेनेटरी पैड

रायपुर, राजधानी रायपुर के बीटीआई ग्राउंड म महिला अउ बाल विकास विभाग कोति ले बीते 5 मार्च ले चार दिन के महिला मड़ई के आयोजन करे जात हे। ये महिला मड़ई म विशेष आकर्षण रायगढ़ अऊ जांजगीर जिला के दू स्टॉल बने हे। दरअसल ए स्टॉल म सेनेटरी पैड ल प्रदर्शनी अऊ बिक्री बर रखे गए हे। विशेषता ये हे कि बाजार म बिकइया कोनो बड़े ब्रांड के जइसे ही अऊ गुणवत्ता म कहूं वोकरो ले बेहतर सेनेटरी पैड के निर्माण इहां गांव के महिला मन करत हें। गांव के महिला मन के बनाए सेनेटरी पैड ल लेके किस्सा घलोक रोचक हे।
रायगढ़ जिला के अंतर्गत उमा स्व-सहायता समूह खम्हार (धरमजयगढ़) के सदस्य सुश्री आशाकिरण अऊ सुश्री मिलिया एक्का ह बताइस कि उमन कुछ साल पहिली फिल्म पैडमेन देखे रहिन, एखर बादेच उमन खुदे सेनेटरी पैड बनाए बर कार्ययोजना बनाइन। ये मा जिला प्रशासन के घलोक पूरा सहयोग मिलीस। जिला प्रशासन कोति ले 16 लाख रूपिया आर्थिक सहयोग के संग तकनीकी सहयोग मिले के बाद समूह ह कोयम्बतूर ले सेनेटरी पैड बनाए के मशीन बिसाईस। बीते जुलाई ले ही पावन ब्रांड नेम ले सेनेटरी पैड के निर्माण उमन शुरू करिन। एक पैकेट सेनेटरी पैड ल बनाए म ए मन ल 25 रूपिया लागत आत हे। शुरुआत म गांव के महिला अऊ युवति मन के बीच ये पैड ल नि:शुल्क वितरण करे गीस। अभी हाल म एक पैकेट ल 27 रूपिया के दर ले विक्रय करे जात हे। जुलाई 2021 ले लेके अब तक समूह ह ब्लॉक के अंतर्गत ही करीबन 6 लाख रूपिया के पैड के बिक्री कर डरे हे। समूह के सदस्य मन के मुताबिक ऊंखर पावन सेनेटरी पैड के खासियत ये हे कि एक पैड म 80 एमएल तक लिक्विड सोखे के क्षमता हे। उहें उपयोग के बाद मिट्टी म दबा देहे ले 90 दिन के भीतर पैड 70 फीसदी तक नष्ट हो जाथे, जेखर से पर्यावरण म घलोक दुष्प्रभाव अपेक्षाकृत कम होथे।
अइसनहे जांजगीर-चाम्पा जिला भारती महिला स्व-सहायता समूह अऊ उजाला महिला स्व-सहायता समूह के महिला मन मिलके सहेली ब्रांड नेम ले सेनेटरी पैड बनावत हें। ए महिला मन ल सेनेटरी पैड बनाए के प्रेरणा यू-ट्यूब म वीडियो देखके मिलीस। एखर बाद बैंक ले दू लाख रूपिया के लोन अऊ एक लाख रूपिया अपन जमापूंजी ल मिलाके सेनेटरी पैड बनाए के काम शुरू करे गीस। समूह के महिला मन ह बताइन कि अब तक ओ मन ल लागत खर्च निकालके डेढ़ लाख रूपिया के आमदनी हो गे हे।