ट्री-गार्ड अऊ मास्क ह समूह के महिला मन ल बनाइस आत्मनिर्भर

कोरिया अऊ सूरजपुर, 18 जून 2021। मुख्यमंत्री श्री भूपेश बघेल कोति ले कोरिया अऊ सूरजपुर जिला म कई ठन विकास काम मन के लोकार्पण अऊ भूमिपूजन कार्यक्रम के समय गौठन अऊ बिहान कार्यरत स्व-सहायता समूह मन के महिला मन ह चर्चा करिन। उही समूह के ग्राम पटना के एकता स्व-सहायता समूह के सदस्य सुश्री हिना बेगम ह मुख्यमंत्री ल बताइस कि साल 2020 म लॉकडाउन के समय 25 हजार मास्क के निर्माण करिन। ये मास्क ल करीबन 3 लाख रूपिया म बेंचिन। एखर से समूह ल डेढ़ लाख रूपिया के मुनाफा होइस। अइसनहे समूह के महिला मन ट्री-गार्ड निर्माण करत हें। समूह ह 12 लाख रूपिया के ट्री-गार्ड बेंच के 3 लाख रूपिया के लाभ कमाए हें। ये आमदनी ल सबो सदस्य मन ह आपस म बांटे हें। अभी हाल म घलोक इमन मास्क अऊ ट्री-गार्ड के काम करत हें। ए काम ले इमन आर्थिक रूप ले मजबूत होए हें अऊ इंकर परिवार के जीवन-यापन म घलोक सहायता मिलत हे।