- ड्यूटी आत अउ लहुटत बेरा म घलोक पुलिसर्मी मन ल प्रभावी पुलिसिंग के निर्देश
- पुलिस महानिदेशक श्री डी एम अवस्थी ह सबो पुलिस अधीक्षक मन ल करिस निर्देशित
रायपुर, पुलिस महानिदेशक श्री डी एम अवस्थी ह महिला सुरक्षा ल ध्यान म रखत प्रदेश के सबो जिला मन के पुलिस अधीक्षक मन ल चिट्ठी लिखके निर्देशित करे हें कि प्रमुख स्थान अउ सुनसान जगा मन म पेट्रोलिंग बढ़ाए जाए। हालेच म रॉची अउ हैदराबाद म महिला मन के संग घटित घटना ल ध्यान म रखत ए निर्देश जारी करे गए हे। निर्देश के मुताबिक महिला मन के प्रति सुनसान जगा या आन स्थान मन म दुष्कर्म, छेड़खानी या दैहिक शोषण के घटना ल रोके बर पुलिस लगातार पेट्रोलिंग करही। राजधानी म अटल नगर (नवा रायपुर), टाटीबंध, रायपुरा, भाटागांव, बोरियाकला, माना, सड्डू, उरला अऊ कबीर नगर के अलावा तीनो रिंग रोड़ के आसपास के क्षेत्र मन म पेट्रोलिंग अउ फिक्स पिकेट बढा़ए के निर्देश देहे गये हे। एखर संगेच पुलिस कर्मी मन ल निर्देश देहे गए हे कि रात्रिकालीन बस, ट्रेन अउ आन परिवहन साधन मन म आकस्मिक चेकिंग करे जाए जेखर से महिला मन के विरूद्ध कोनो अपराध घटित झन हो पावय।
निर्देश म कहे गए हे कि काबर कि पुलिसकर्मी वर्दी म हमेशा ड्यूटी म रहिथें ते खातिर ड्यूटी आत अउ लहुटत बेरा पुलिसिंग बर तत्पर रहंय। पुलिस के ये समाज के प्रति नैतिक जिम्मेदारी घलोक हे। महिला मन के सुरक्षा के संबंध म कोनो लापरवाही बर्दाश्त नइ करे जाए। कोनो प्रकार के शिकायत मिले म सख्त कार्यवाही करे जाही। महिला मन के प्रति घटना के रोकथाम बर कंट्रोल रूम म हेल्पलाईन नंबर, महिला डेस्क अउ आन सुविधा घलोक प्रदान करे जात हे। आपात समय म हेल्पलाईन नंबर अथवा कंट्रोल रूम म तुरंते संपर्क करे जा सकत हे।
