महिला थाना के काउंसलर मन उपर बड़का कार्रवाई, एसपी ह पद ले हटाइस

दुर्ग 27 मई 2024। दुर्ग म महिला थाना म पारिवारिक मामला मन के काउंसिलिंग करइया 7 काउंसलर मन के एसपी ह छुट्टी कर देहे हे। एसपी जितेंद्र शुक्ला तीर सरलग काउंसिलिंग म दुर्व्यवहार अऊ पक्षपात करे के शिकायत पहुंचत रहिस। एखर उपर कार्रवाई करत एसपी ह 7 काउंसलर मन ल हटाए के आदेश जारी कर देहे हें। उमन कहिन कि महिला थाना ल सशक्त बनाए खातिर पहल करे जाही। जानबा हे के, दुर्ग महिला थाना म पहुंचइया पारिवारिक मामला के काउंसलिंग बर काउंसलर मन के नियुक्ति करे गए हे। जिहां पारिवारिक मामला ल परामर्श के माध्यम ले सुलझाए के प्रयास करे जाथे। फेर एसपी जितेंद्र शुक्ला तीर सरलग महिला थाना के काउंसलर मन कोति ले आवेदक-अनावेदक मन संग दुर्व्यवहार अऊ पक्षपात के शिकायत मिलत रहिस। ते पाए के एसपी जितेंद्र शुक्ला ह तीन झिन मेडम मन ल दुर्व्यवहार अऊ पक्षपात के शिकायत म हटा दीस। उहें चार झिन मेडम मन ल सरलग अनुपस्थिति के चलते हटा दे गीस। जानबा हे के दुरूग म सरकारी उकील अउ ये पद ल पाए खातिर बिकट झन मेडम-साहेब मन भाजपा जुवाईन करे हें अउ नेता-सेता के आगू-पाछू किंजरत हें।