मुख्यमंत्री ह करीन बड़का घोषणा : निजी स्कूल के लइका मन तको महतारी दुलार योजना के मिलही लाभ

रइपुर, 14 जून 2021 सम्मार। मुख्यमंत्री दाउ भूपेश बघेल ह आज एक ठन बड़का घोषणा करत कहीन कि कोरोना महामारी ले अपन दाई —ददा या अभिभावक ल गवां डारे लइका जउन निजी स्कूल म पढ़त रिहिन उन्कर पढ़ई के खर्चा तको छत्तीसगढ़ सरकार उठाही। उन मन ल राज्य सरकार कोति ले चालू करे महतारी दुलार योजना के लाभ मिलही। प्राइवेट स्कूल मन म पाछू एक बछर ले पढ़त अइसन लइका मन उही निजी स्कूल या स्वामी आत्मानंद इंग्लिश मीडियम स्कूल म अपन इच्छानुसार पढ़ सकही ।
छत्तीसगढ़ सरकार डाहरल ले कोरोना महामारी ले मृत मनखे या पालक मन के अइसन लइका जोन शासकीय स्कूल मन म अध्ययनरत रिहिने उन मन ल फोकट म शिक्षा अउ मासिक छात्रवृत्ति देहे बर महतारी दुलार योजना चालू करे गे हवय। मुख्यमंत्री के ये घोषणा के बाद अब शासकीय स्कूल के संगे-सग प्राइवेट स्कूल मन म पढ़इया अइसन लइका जिन्कर दाई—ददा अथवा पालक के कोरोना महामारी ले मउत होगे हे उन्मन ल महतारी दुलार योजना के लाभ मिलही।
महतारी दुलार योजना ले छात्र मन ल पहली ले 8वीं तक 500 रूपए अउ कक्षा 9वीं ले 12वीं तक एक हजार रूपए प्रति माह के छात्रवृत्ति देहे जाही। योजना के लाभ छत्तीसगढ़ के मूल निवासी परिवार के बेसहारा लइका मन के छोड़ अइसन लइका जिन्कर परिवार के कमइया दाई या ददा या दूनों के मउत कोविड-19 ले हो गे हे, एकर लाभ मिलही।
बेसहारा लइका मन के संबंध म कोनो भी साधन ले कलेक्टर ल जानकारी मिले म, वोह जिला शिक्षा अधिकारी ल उपलब्ध कराहीं। एकर छोड़ छात्र सउंहत या अभिभावक कोति ले जिला शिक्षा अधिकारी ल सोज्झे आवेदन कर सकही। मिले आवेदन पत्र मन के परीक्षण जिला शिक्षा अधिकारी के अध्यक्षता म समिति गठित होही, जेमे स्वास्थ्य विभाग अउ समाज कल्याण विभाग के एकक अधिकारी नामांकित करे गे हे । समिति के अनुशंसा म जिला कलेक्टर कोति ले स्वीकृति देहे जाही।