महतारी वंदन योजना बनिस महिला मन बर सहारा

रायपुर, राज्य सरकार के महतारी वंदन योजना आज वो जरूरतमंद महिला मन बर संबल बनके उभरे हें, जेन आर्थिक अभाव अऊ पारिवारिक चुनौती मन के सामना करत हें। योजना के अंतर्गत पात्र हितग्राही मन ल हर महीना 1000 रूपिया के आर्थिक सहायता देहे जात हे, जेखर से न केवल उंखर दैनिक जरूरत मन के पूर्ति होवत हे, बल्कि उमन म आत्मविश्वास अऊ सम्मान के भावना घलोक बाढ़े हे।
जिला के जरहाभाठा मिनी बस्ती रहवइया श्रीमती शिवानी पटेल अऊ श्रीमती अहिल्या बाई घलोक ओही महिला मन म सामिल हे, जिंकर जीवन म ये योजना कोनो वरदान ले कम नइ हे। शिवानी पटेल बताथे के घर के जिम्मेदारी अऊ लइका मन के पढ़ाई के खरचा उठाना पहिली वोखर बर अड़बड़ कठिन रहिस। वो ह कहिस, महतारी वंदन योजना ले मिलइया सहायता राशि ले मैं समय म घर के राशन अऊ लइका मन के जरूरत के सामान बिसा पात हंव। एखर से आत्मनिर्भरता अऊ आत्मविश्वास दुनों म बढ़ोतरी होए हे।
अइसनहे श्रीमती अहिल्या बाई, जेन कइ बछर ले दूसर मन के घर म काम करके कोनो प्रकार ले अपन गुजारा करत रहिन, वो ह योजना ल अपन जीवन के बड़का सहारा मानथे। ओ कहिस, उम्र के ए पड़ाव म काम करना मुश्किल हे। अइसन म सरकार ले मिलइया मदद हमार जइसे गरीब मन बर बहुत उपयोगी हे। अब छोट-छोट जरूरत मन बर कोनो के आगू हाथ नइ फैलाना परत हे।