महतारी वंदन योजना ले राखी के खुसी होइस दुगना

महासमुंद, छत्तीसगढ़ शासन के महतारी वंदन योजना ह प्रदेश के लाखों महिला मन के जिंदगी म सकारात्मक बदलाव लाए हे। ए योजना ले मिलीस आर्थिक सहायता ले महिला मन न केवल अपन परिवार के जरूरत पूरा करत हे, बल्कि ए पइत राखी के तिहार घलोक पूरा उल्लास अऊ आत्मसम्मान के संग मनावत हे।
बालोद जिला के ग्राम अरौद के लाभार्थी टोमिन बाई सेवता ह बताइस के महतारी वंदन योजना ले मिले राशि ले वो अपन भाई बर राखी अऊ मिठई बिसाए हे। वो ह कहिस के ये योजना वोखर बर कोनो उपहार ले कम नइ हे। उहें यामिनी कोठारी ह योजना के 18वीं किस्त मिले म बताइस के ए पइत रक्षाबंधन खास होही, काबर के अब वो अपन खरचा खुद उठावत हे।
नारायणपुर जिला के श्रीमती हीरोंदी कड़ियाम, जेन पहिली साप्ताहिक बाजार मन म लाई अऊ चना बेचके अपन परिवार के पालन-पोषण करत रहिन, अब महतारी वंदन योजना ले मिले राशि ल अपन व्यवसाय म लगाके मूंगफली, नमकीन, बिस्किट, नड्डा जइसे खाद्य पदार्थ घलोक बेचत हे। वोखर आय पहिली ले दुगना हो गए हे। हीरोंदी के कहना हे के ए पइत रक्षाबंधन म अपन लइका मन अऊ परिवार बर मिठाइ अऊ उपहार लेहे म ओ मन ल कोनो हिचक नइ हे।
महासमुंद के पुष्पा प्रजापति ह बताइस के पहिली ओ मन ल हर छोट- मोट जरूरत बर पति या बेटा ले पइसा मांगे ल परत रहिस, फेर अब ए योजना के राशि ले ओ ल लइका मन के पढ़ाई के खरचा घलोक निकालत हे अऊ रक्षाबंधन बर श्रृंगार सामान अउ उपहार घलोक बिसावत हे। उमन कहिन के ये योजना महिला मन के जीवन म आत्मनिर्भरता लावत हे अऊ स्वरोजगार ले आगू बढ़त हें।
ए सबो महिला मन ह मुख्यमंत्री श्री विष्णु देव साय अऊ महिला अऊ बाल विकास मंत्री श्रीमती लक्ष्मी राजवाड़े ल धन्यवाद देवत कहिन के महतारी वंदन योजना सिरिफ आर्थिक सहायता नइ, बल्कि सम्मान, आत्मविश्वास अऊ खुसी के उत्सव हे, जेकर सेती ऊंखर जइसे हजारों महिला मन के जीवन बदलत हे।