महतारी वंदन योजना : माता-बहिनी मन के सम्मान ले ही छत्तीसगढ़ के समृद्धि संभव – मुख्यमंत्री श्री साय

रायगढ़, मुख्यमंत्री श्री विष्णुदेव साय ह आज रायगढ़ जिला के खरसिया म आयोजित भव्य कार्यक्रम म महतारी वंदन योजना के 19वां किस्त के भुगतान करिन। ए बेरा म उमन प्रदेश के 69,15,994 महिला मन के बैंक खाता म सीधा 1000-1000 रूपिया के राशि अंतरित करिन। कुल 647.13 करोड़ रूपिया के ये राशि एक किलिक के माध्यम ले हस्तांतरित करे गीस।
मुख्यमंत्री श्री साय ह ए बेरा म कहिन के महतारी वंदन योजना महिला मन के जीवन स्तर ल बेहतर बनाए अऊ ऊंखर आत्मसम्मान ल सशक्त करे के दिशा म एक क्रांतिकारी पहल हे। उमन विश्वास व्यक्त करिन के ये आर्थिक सहयोग महिला मन ल आत्मनिर्भर बनाही, संगेच परिवार के आर्थिक मजबूती अऊ सामाजिक सुरक्षा म घलोक सहायक सिद्ध होही। उमन महिला मन ले संवाद करत भरोसा देवाइन के राज्य सरकार हमेशा ऊंखर संग खड़े हे अऊ ऊंखर जीवन ल बेहतर बनाए बर सरलग कदम उठात रइही।
मुख्यमंत्री श्री विष्णुदेव साय ह कहिन के ये योजना छत्तीसगढ़ के माता-बहिनी मन के जीवन म आशा, विश्वास अऊ नवा प्रेरणा के संचार करत हे। उमन भरोसा देवाइन के राज्य सरकार महिला मन के बेहतरी अऊ समाज के उन्नति बर अइसनहे सरलग काम करत रइही।
कार्यक्रम म उप मुख्यमंत्री श्री अरुण साव, वित्त मंत्री श्री ओ.पी. चौधरी संग बड़ संख्या म गणमान्य नागरिक उपस्थित रहिन।