महिला मन जतावत हे विष्णु भईया के मया के भेंट बर आभार
बलौदाबाजार, 5 सितंबर 2024। छत्तीसगढ़ के गांव-गांव म तीजा तिहार के खुशी महतारी वंदन योजना ह बढ़ा देहे हे। मुख्यमंत्री श्री विष्णुदेव साय ह पोला तिहार म महतारी वंदन योजना के सतवइया किश्त के राशि महिला मन के खाता म जमा करे हे। ए योजना के तहत मिले सहायता राशि ह महिला मन बर तीजा के तैयारी ल खास बना देहे हे।
बलौदाबाजार के ग्राम सकरी के रहवइया श्रीमती धारणा साहू अऊ श्रीमती रांति साहू ह खुशी-खुशी बताइस के “तीजा के ये तिहार हमार बर अड़बड़ खास हो गए हे। मुख्यमंत्री जी ह हमला महतारी वंदन योजना के जेन राशि मिले हे ओखर से हम लुगरा अऊ तीजा के संवागा बिसाबो। ये भाई के मसा के भेंट ये जेखर बर हम मुख्यमंत्री ल दिल ले धन्यवाद देवत हन।
छत्तीसगढ़ म तीजा के तिहार महिला मन के जीवन म एक विशेष स्थान रखथे। ये तिहार न केवल पारिवारिक प्यार अऊ बंधन ल मजबूत करथे, भलुक पति के दीर्घायु के संग पति अऊ पत्नी म आपसी परेम अउ मया ल घलोक बढ़ाथे। ए पइत तीजा के मौका म बलौदाबाजार विकासखंड के ग्राम सकरी के दू महिला श्रीमती धारणा साहू (भतीजी) अऊ श्रीमती रांति साहू (बुआ) अपन मइके म तिहार के खुशि ल साझा करे आए हें।
श्रीमती धारणा साहू के शादी दू साल पहिली नंद किशोर साहू ले होए रहिस। वोखर पति ग्राम जारा विकासखंड पलारी म किराना दुकान चलाथे। परिवार म ससुर, सास अऊ एक देवर के संग कुल पांच सदस्य हे। उहें, श्रीमती रांति साहू अपन जीवन म कठिनाइ के सामना करत हे। वोखर पति महेंद्र साहू, के सात साल पहिली बीमारी म निधन हो गए रहिस। रांति साहू खरोरा के एक निजी स्कूल म स्वीपर के काम करथे। श्रीमती रााती अपन बेटी के संग ससुराल, ग्राम मोहरेंगा (रायपुर जिला) म रहिथे। वोखर बेटी कक्षा 5 वीं म पढ़थे, जबकि बेटा अपन नाना के घर रहिके कक्षा 4थीं के पढ़ाई करत हे।
ए योजना के माध्यम ले महिला मन ल अकतहा आर्थिक सहायता मिले ले ऊंखर चेहरा म भरोसा अऊ खुशी साफ झलकथे। तिहार के रौनक के बीच, ये मदद वोखर बर एक नवा उछाह लेके आए हे, जेखर से ओ मन अपन परिवार के संग तीजा के परब अऊ आनंद ले मना सकहीं।