रायपुर, मुख्यमंत्री श्री विष्णु देव साय ह अंतरराष्ट्रीय महिला दिवस के मउका म बस्तर के लाल बहादुर शास्त्री मिनी स्टेडियम म आयोजित ‘वृहद महतारी वंदन सम्मेलन–2026’ म प्रदेश के दाई-बहिनी मन ला सुभकामना देवत कहिन के छत्तीसगढ़ के मातृशक्ति समाज के सबले बड़े शक्ति आय। उमन कहिन के महिला मन के आर्थिक अउ सामाजिक सशक्तिकरण ही विकसित छत्तीसगढ़ के मजोत नेव आय अउ राज्य सरकार के हर फैसला महिला मन के कलयान, सनमान अउ आत्मनिर्भरता ला धियान म रख के लेहे जात हे।
मुख्यमंत्री श्री विष्णु देव साय ह ए मउका म महतारी वंदन योजना के 25वां किस्त जारी करत प्रदेश के 69 लाख 48 हजार महिला मन के खाता म 641 करोड़ 58 लाख रूपया अंतरित करिन। एखर संगेच ए योजना के तहत अब तक महिला मन ला 16 हजार 237 करोड़ रूपया के रासि देहे जा चुके हे। उमन कहिन के ए योजना सिरिप आर्थिक सहायता के माधयम नो हे, बल्कि दाई-बहिनी मन के आत्मविस्वास, सनमान अउ आत्मनिर्भरता ला पोठ करइया जनकल्याणकारी अभियान बन चुके हे।
मुख्यमंत्री ह कहिन के उमन ला 10 मार्च 2024 के ओ दिन सुरता हे, जब प्रधानमंत्री श्री नरेंद्र मोदी ह महतारी वंदन योजना के सुभारंभ करे रहिन। ओही बखत ए संकल्प लेहे गे रहिस के प्रदेश के हर एक पात्र महिला के खाता म हर महीना तय तिथी म एक हजार रूपया के रासि पहुँचही। पाछू 25 महीना ले ए संकल्प ह सरलग पूरा होवत हे अउ ए किस्त के संग अब तक हर एक हितग्राही महिला ला 25 हजार रूपया के रासि मिल चुके हे। उमन कहिन के हमर सरकार ह जेन वादा करे रहिस, ओला पूरा निस्ठा के संग निभाय हे।
मुख्यमंत्री श्री साय ह बताइन के महतारी वंदन योजना ला बिना कोनो रुकावट के जारी रखे बर राज्य सरकार ह ए बछर के बजट म 8 हजार 200 करोड़ रूपया के प्रावधान करे हे। उमन कहिन के ए रासि ह दाई-बहिनी मन के जिनगी म सीधा बदलाव लावत हे। महिला मन ए सहायता के उपयोग लइका मन के पढ़ई, स्वास्थय, घर के जरूरत, बचत अउ स्व-रोजगार जैसे जरूरी काम म करत हें। एखर से परिवार मन म आर्थिक थिरता बाढ़त हे अउ समाज के विकास ला नवा दिसा मिलत हे।
मुख्यमंत्री श्री साय ह कहिन के प्रदेश के दाई-बहिनी मन सिरिप परिवार ला नइ चलावय, बल्कि उमन बने आर्थिक प्रबंधक घलो होथे। उमन कहिन के महतारी वंदन योजना ले मिले रासि के महिला मन ह बहुते समझदारी ले उपयोग करे हें। कोनो ह बेटी मन के भविस्स बर बचत करिन, कोनो ह स्व-रोजगार सुरू करिन, कोनो ह परिवार के छोटे बियापार ला बढ़ाइस, त कोनो ह लइका मन के सिच्छा अउ सवास्थय म खरचा करके घर के स्थिति ला पोठ बनाइस। एहा ए योजना के सबले बड़े सफलता आय के महिला मन ह एला अपन अउ परिवार के उन्नति के माधयम बनाइन।
मुख्यमंत्री श्री साय ह कहिन के प्रधानमंत्री श्री नरेंद्र मोदी अउ केंद्रीय गृह मंत्री श्री अमित शाह के पक्का संकल्प अउ सुरक्षा बल मन के साहस ले नक्सलवाद अब आखिरी दौर म पहुँच चुके हे। नक्सल हिंसा ले प्रभावित परिवार अउ आत्म-समर्पण करइया नक्सली मन के पुनर्वास बर राज्य सरकार ह 15 हजार आवास मंजूर करे हे। उमन कहिन के बस्तर के संगे-संग दुरिहा के इलाका मन म सांति, विकास अउ विस्वास के नवा वातावरण बनत हे, जेमा महिला मन के भागीदारी बहुते जरूरी हे।
मुख्यमंत्री ह बताइन के स्व-सहायता समूह के माधयम ले महिला मन के आमदनी बढ़ाय बर राज्य सरकार सरलग उदीम करत हे। प्रदेश म अब तक 8 लाख महिला मन ला ‘लखपति दीदी’ बनाये जा चुके हे अउ अब सरकार के लच्छ एला बढ़ा के 10 लाख लखपति दीदी बनाये के हे। उमन कहिन के महिला मन अब सिरिप सहभागी नो हें, बल्कि ग्रामीण अरथवियवसथा के नवा नेतृत्व करइया शक्ति बनके उभरत हें। इही दिसा म महिला सव-सहायता समूह मन के माधयम ले ‘रेडी टू ईट फूड’ निर्माण के काम ला फेर ले सुरू कराय गे हे।
कइयो हितग्राही मन ले गोठ-बात करत मुख्यमंत्री ह जानिन के कइसे ए रासि ले कोनो ह ई-रिक्सा बिसाइन, त कोनो ह ब्यूटी पार्लर अउ सिलाई सेंटर सुरू करिन। ए मउका म महिला एवं बाल विकास मंत्री श्रीमती लक्ष्मी राजवाड़े, वन मंत्री श्री केदार कश्यप, विधायक श्री किरण देव अउ आन मनखे मन घलो उपस्थित रहिन।
महतारी वंदन योजना ले मातृशक्ति ला मिलिस आर्थिक सहारा : मुख्यमंत्री श्री विष्णु देव साय
