अंतर्राष्ट्रीय महिला दिवस म उपमुख्यमंत्री श्री विजय शर्मा कवर्धा म जिलास्तरीय महतारी वंदन कार्यक्रम म शामिल होइन
कबीरधाम के महिला मन ला 24 किस्त म मिलिस 563.49 करोड़ रूपया
बढ़िया काम करइया महिला मन ला उप मुख्यमंत्री ह प्रसास्ति पत्र अउ प्रतीक चिन्ह भेंट करके करिन सनमान
कबीरधाम, अंतर्राष्ट्रीय महिला दिवस के मउका म मुख्यमंत्री श्री विष्णुदेव साय ह महतारी वंदन योजना के 25वां किस्त के रासि बस्तर म आयोजित कार्यक्रम ले जारी करिन। ए मउका म कवर्धा के वीर सावरकर भवन म महतारी वंदन सम्मेलन के आयोजन करे गिस। ए कार्यक्रम म उपमुख्यमंत्री श्री विजय शर्मा अउ सांसद श्री संतोष पाण्डेय घलो सामिल होइन।
सम्मेलन म अलग-अलग क्षेत्र म बढ़िया काम करइया महिला मन ला उपमुख्यमंत्री श्री विजय शर्मा ह प्रसास्ति पत्र अउ प्रतीक चिन्ह भेंट करके सनमानित करिन। ए बखत जिला पंचायत अध्यक्ष श्री ईश्वरी साहू, नगर पालिका अध्यक्ष श्री चन्द्र प्रकाश चंद्रवंशी, उपाध्यक्ष श्री कैलाश चंद्रवंशी, जनपद पंचायत अध्यक्ष श्रीमती सुषमा बघेल अउ आन जनतिनिधि मन के संगे-संग भारी संख्या म महिला मन उपस्थित रहिन।
उपमुख्यमंत्री श्री विजय शर्मा ह विस्व महिला दिवस के बधाई देवत कहिन के सिरिफ आजे नो हे, हर दिन महिला दिवस आय। समाज म जब कोनो बने बदलाव लाना होथे, त ओखर सुरूवात महिला मन ले होथे। कइ बछर ले ए हमर परंपरा आय, जिहाँ दाई मन के जगा समाज म सबले ऊपर हे। हमर देस म दाई मन ला देवी के रूप म पूजे जाथे। ओमन कहिन के भारत म बदलाव बर महिला शक्ति ला सव-सहायता समूह के माधयम ले आगू बढ़ाय के काम करे जात हे। महिला मन ला स्व-रोजगार अउ सहकारिता ले जोड़ के ‘लखपति दीदी’ के रूप म आगू बढ़ाय जात हे।
श्री शर्मा ह कहिन के महतारी वंदन योजना महिला सशक्तिकरण बर हमर संकल्प ला देखाथे। हर महीना 1 हजार रूपया के रासि महिला मन ला मिलत हे, जेखर ले ओमन आत्मनिर्भर बनत हें। ओमन आगे बताइन के महिला मन ला बैंक जाय के तकलीफ झन होवय, एखर बर हर पंचायत म ‘अटल डिजिटल केंद्र’ खोले जात हे। स्व-सहायता समूह बर ‘महतारी सदन’ बनाये जात हे। संगे-संग प्रधानमंत्री श्री नरेंद्र मोदी के अगुवाई म सदन म महिला मन बर 33 प्रतिसत आरक्षण के बेवसथा करे गे हे, जेखर ले नीति निर्धारण म महिला मन के भागीदारी बाढ़ही।
सांसद श्री संतोष पांडे ह कहिन के महिला ह सिरिफ एक परिवार नो हे, बल्कि पूरे समाज अउ देस के नेव तैयार करथे। जिला पंचायत अध्यक्ष श्री ईश्वरी साहू ह कहिन के सासन ह महिला मन के आर्थिक अउ सामाजिक जीवन ला बेहतर बनाये बर सरलग काम करत हे। बता दन के कबीरधाम जिला के 2.48 लाख ले जादा महिला मन ला अब तक 24 किस्त म 563.49 करोड़ रूपया जारी करे जा चुके हे।
कार्यक्रम म श्रीमती गंगोत्री, श्रीमती यशोधरा मानिकपुरी, श्रीमती प्रीति सिंह परिहार सहित कइ महिला मन अउ ‘नई सोच नई राह नारी शक्ति’ टीम ला समाज सेवा बर सनमानित करे गिस।
