महतारी वंदन योजना बनिस महिला मन के आत्मनिर्भरता के आधार, लाभान्वित महिला मन ह मुख्यमंत्री श्री साय ला कहिन धन्यबाद

रायपुर, अंतरराष्ट्रीय महिला दिवस के मउका म 8 मार्च के बस्तर म आयोजित बड़े महतारी वंदन कार्यक्रम के बखत श्रीमती अनीता साहू अउ श्रीमती मिथलेश चतुर्वेदी ह मुख्यमंत्री श्री विष्णुदेव साय ले वीडियो कॉल (वर्चुअल) के माध्यम ले गोठ-बात करिन। ए दौरान ओ मन ह महतारी वंदन योजना ले अपन जिनगी म आय बदलाव के बारे म बताइन अउ एखर बर उंकर आभार घलो जताइन।
गौरेला पेंड्रा मरवाही जिला के गौरेला विकासखण्ड के ग्राम खोडरी के श्रीमती अनीता साहू ह बताइस के महतारी वंदन योजना ले हर महीना मिलइया पइसा ले ओ ह सिलाई मशीन बिसाइस अउ सिलाई के काम सुरू करिस। पहिली ओला पइसा-कउड़ी बर बहुत दुख-तकलीफ उठाना परय, काबर के ओकर घरवाला के मानसिक स्थिति ठीक नइ होय के सेती परिवार के सबो जिम्मेदारी ओकरे ऊपर रिहिस। अब खेती-किसानी, मजदूरी अउ सिलाई के काम ले होइया कमाई ले ओकर जिनगी के स्तर ह सुधर गे हे। ओ ह “अनीता सिलाई सेंटर” के नाम ले अपन व्यापार के पंजीयन घलो करवाय हे अउ महिला एवं बाल विकास विभाग के सक्षम योजना के तहत एक लाख रूपया के करज घलो लेहे हे।
इही रद्दा म मोहला मानपुर अंबागढ़ चौकी जिला के श्रीमती मिथलेश चतुर्वेदी ह बताइस के घरवाला के गुजर जाय के बाद परिवार के पालन-पोषण करना ओकर बर एक बड़े चुनौती बन गे रिहिस। सासन ले मिले मदद अउ महतारी वंदन योजना के सहयोग ले ओ ह ई-रिक्शा बिसा के कमाई के नवा जरिया सुरु करिस। अब ओ ह पूरा आत्मसम्मान के संग अपन परिवार के पेट पालत हे।
दुनो महिला मन ह कहिन के महतारी वंदन योजना ह ओ मन ला आर्थिक मजबूती देहे के संगे-संग आत्मविश्वास घलो देहे हे। ओ मन ह ए जनकल्याणकारी योजना बर मुख्यमंत्री श्री विष्णुदेव साय ला हृदय ले धन्यबाद कहिन।