महतारी वंदन योजना के मदद ले अनिता बनिस आत्मनिर्भर

CHHATTISGARHI NEWS: मुंगेली, छत्तीसगढ़ सरकार के महतारी वंदन योजना ले मिलत हर महीना एक हजार रुपिया के सहायता राशि मुंगेली जिला के ग्राम घुठेरा के श्रीमती अनीता गंधर्व बर आत्मनिर्भर बने के आधार बने हे। आर्थिक रूप ले कमजोर परिवार के अनीता योजना के रकम ला खर्च करे के बजाय बचत करके मुंगेली के पुराना बस स्टैंड म मनिहारी अउ सिलाई दुकान शुरू करे हे।
सीमित साधन ले शुरू करे गे दुकान ला अनीता के मेहनत, ग्राहक मन संग बने व्यवहार अउ गुणवत्तापूर्ण सेवा ले धीरे-धीरे सफलता मिले हे। अब दुकान म रोजमर्रा के मनिहारी सामान के संग सिलाई के काम घलो होथे। एकर से अनीता रोज करीबन 500 ले 1000 रुपिया तक कमई करत हे।
दुकान ले होवत आमदनी ले वो अपन बच्चा मन के पढ़ई, घर-परिवार के जरूरत अउ रोज के खर्च ला पूरा कर पावत हे। अब छोटे-छोटे जरूरत बर दूसर के ऊपर निर्भर रहे के जरूरत नइ परत हे। अनीता बताथे के महतारी वंदन योजना के रकम ओकर बर आत्मनिर्भर बने के पहिली सीढ़ी साबित होइस।
अनीता कहिस के कहूं महिला मन योजना ले मिलत राशि के बचत करके स्वरोजगार या छोटे कारोबार म लगावंय, त उमन आर्थिक रूप ले मजबूत बन सकथें। वो ह योजना बर मुख्यमंत्री के प्रति आभार जताइस।
अनीता गंधर्व के सफलता जिला के दूसर महिला मन बर घलो प्रेरणा बनत हे। वोकर कहानी बताथे के सही अवसर अउ मेहनत के संग छोट कन शुरुआत घलो आर्थिक आत्मनिर्भरता के मजबूत आधार बन सकथे।