महतारी वंदन योजना के 6 वां किश्त म महिला मन ल मिलही एक-एक हजार रूपिया
महतारी वंदन एप के होही शुभारंभ
एक पेड़ मां के नाम अभियान के होही शुभारंभ
3061 महिला स्व-सहायता समूह मन ल बांटहीं 100 करोड़ रूपिया के करजा
बस्तर जिला ल 9.31 करोड़ के विकास काम मन के देंहीं सौगात
रायपुर, 31 जुलाई 2024/ मुख्यमंत्री श्री विष्णु देव साय ह अपन जगदलपुर दउरा के बेरा 01 अगस्त के उहां आयोजित जिला स्तरीय महिला सम्मेलन म सामिल होहीं अऊ प्रदेश के महिला मन ल महतारी वंदन योजना के तहत 1000-1000 रूपिया के 6 वां किश्त जारी करके राखी तिहार के उपहार देहीं। ए मौका म ओ मन महतारी वंदन एप के घलोक शुभारंभ करहीं।
जानबा हे कि महतारी वंदन योजना के तहत प्रदेश के लगभग 70 लाख विवाहित महिला मन ल ऊंखर आर्थिक सशक्तिकरण के मद्देनजर राज्य सरकार कोति ले हर महिना एक-एक हजार रूपिया ऊंखर बैंक खाता म अंतरित करे जात हे।
सम्मेलन म मुख्यमंत्री श्री साय 2752 महिला स्व-सहायता समूह मन ल आर्थिक गतिविधि मन के संचालन बर वित्तीय समावेशन के तहत 100 करोड़ के बैंक लोन घलोक बांटहीं। कार्यक्रम म शहीद गुण्डाधूर के प्रतिमा के अनावरण के संग ही नारी शक्ति ले जल शक्ति रथ ल हरी झण्डी देखाके रवाना करहीं।
एक पेड़ माँ के नाम
मुख्यमंत्री श्री साय एक पेड़ माँ के नाम महावृक्षारोपण अभियान के शुभारंभ करहीं। ए मौका म महतारी वंदन योजना के हितग्राही के संग ही उद्योग विभाग, श्रम विभाग संग आन विभाग के हितग्राही मन ल घलोक सामान वितरण करे जाही। जानबा हे कि प्रधानमंत्री श्री नरेन्द्र मोदी ह विश्व पर्यावरण दिवस के मौका म एक पेड़ मां के नाम के वृक्षारोपण अभियान के शुभारंभ करे हें। ए अभियान के अंतर्गत देश म सितमबर 2024 तक 80 करोड़ अउ मार्च 2025 तक 140 करोड़ वृक्ष के रोपण के लक्ष्य हे। एक पेड़ मां के नाम महावृक्षारोपण अभियान के अंतर्गत छत्तीसगढ़ राज्य म 2 करोड़ 75 लाख पौधा के रोपण अउ वन विभाग कोति ले वन अउ वनेत्तर क्षेत्र मन म 03 करोड़ 95 लाख 85 हजार पौधा के रोपण करे जात हे।
विकास कार्य के लोकार्पण
मुख्यमंत्री श्री साय जगदलपुर म 9 करोड़ 31 लाख ले जादा राशि के विकास काम मन के लोकार्पण करहीं। एमां 48.03 लाख के लागत ले अनुविभागीय दण्डाधिकारी कार्यालय जगदलपुर, तोकापाल अऊ लोहांडीगुड़ा अउर 66.49 लाख के लागत ले नवीन तहसील कार्यालय जगदलपुर के जीर्णद्धार के संग 2.50-2.50 करोड़ के लागत ले निर्मित लोहांडीगुड़ा अऊ बुरगुम थाना सामिल हे।
अइसनहे जिला अस्पताल (महारानी अस्पताल) परिसर म डीएमएफटी मद के तहत 01 करोड़ 72 लाख 76 हजार के लागत ले स्थापित माडुलर किचन अउ सामान संग अन्नपूर्णा रसोईघर के लोकार्पण करे जाही। संगेच महारानी लक्ष्मी बाई अस्पताल परिसर म प्रधानमन्त्री भारतीय जन औषधि केंद्र के घलोक शुभारंभ करे जाही।
महतारी वंदन एप
महतारी वंदन योजना के क्रियान्वयन ल अऊ सुदृढ़ बनाए बर महतारी वंदन मोबाईल ऐप के घलोक शुभारंभ करे जात हे। ए एप के माध्यम ले हितग्राही मन ल हर महीना होए भुगतान अऊ ये राशि कोन खाता म आए हे के जानकारी आसानी ले मिल सकही।
महतारी वंदन योजना के कोनो हितग्राही के असामायिक मृत्यु हो जाही त ए सूचना घलोक इही मोबाईल ऐप के माध्यम ले देहे जा सकत हे। ए एप के संग शिकायत भेजे जा सकत हे अउ निराकरण के स्थिति घलोक देखे जा सकत हे। कहूं कोनो हितग्राही ल ओला प्राप्त होवत लाभ त्याग करना होही त घलोक मोबाईल ऐप के माध्यम ले लाभ त्याग करे जा सकही। एखर अलावा शासन कोति ले योजनांतर्गत समय-समय म जारी दिशा-निर्देश के सूचना घलोक इही मोबाईल ऐप के माध्यम ले हितग्राही मन ल प्राप्त हो सकही।
महतारी वंदन योजना के हितग्राही मन के सुविधा बर बनाय गए ये मोबाईल ऐप एन्ड्रायड बेस हे अउ एला प्लेस्टोर ले ये कड़ी ले डाउनलोड करे जा सकत हे।