महतारी वंदन योजना बनिस आत्मनिर्भरता के मिसाल प्रमिला चौधरी सफल व्यवसायी बनके करत हे परिवार के पालन पोषण

नारायणपुर, जिला के ग्राम डोंगरीपारा, पंचायत ओरछा के निवासी श्रीमती प्रमिला चौधरी ह प्रतिकूल परिस्थिति म घलव साहस अउ संकल्प के संग आत्मनिर्भर बने के जेन प्रयास करिस, ओ ह आज कई महिला मन बर प्रेरणा के स्रोत बन गे हे। पति के असामयिक निधन के बाद तीन लइका के पूरा जिम्मेदारी ओखर खांध उपर आ गिस। कठिन परिस्थिति म घलो ओ ह हार नइ मानिस अउ आजीविका बर मनिहारी सामान के एक छोट कन दुकान के शुरुआत करिस।
सुरु म वोकर आय सीमित रहिस अउ ओखर व्यवसाय ह साप्ताहिक बाजार उपर ही निर्भर रहिस। ए बीच छत्तीसगढ़ शासन कोति ले महतारी वंदन योजना के तहत ओला हर महिना 1000 रूपिया के सरलग सहायता राशि मिले लगिस। प्रमिला चौधरी ह ए आर्थिक सहयोग ल आत्मनिर्भरता के आधार बनाके अपन व्यवसाय ल बढ़ाइस। वो ह अपन दुकान म सौंदर्य प्रसाधन, बिंदी, चूड़ी, घरेलू उपयोग के सामान आदि शामिल करिस, जेखर से ओखर दुकान अधिक आकर्षक अउ उपयोगी हो गइस।
श्रीमती प्रमिला चौधरी ओरछा के साप्ताहिक बाजार के संगे-संग तीर के छोटे डोंगर बाजार म घलो दुकान लगाथे। ए ह ओखर आय म उल्लेखनीय वृद्धि करे हे अऊ ओ ह न केवल अपन परिवार के जरूरत ल पूरा करे म सक्षम हे, बल्कि अपन लइका मन ल बेहतर शिक्षा अऊ जीवन घलो प्रदान करत हे।
प्रमिला चौधरी ह छत्तीसगढ़ सरकार अऊ मुख्यमंत्री श्री विष्णुदेव साय के प्रति आभार व्यक्त करत कहिस के महतारी वंदन योजना ह वोखर जइसे कतको जरूरतमंद परिवार मन बर आशा के किरण प्रदान करे हे। ए योजना न केवल महिला मन ल आर्थिक रूप ले सशक्त बनात हे, बल्कि ओमन ल स्वाभिमान अउ सम्मान के संग जीवन जीए के दिशा घलो देवत हे।