महतारी वंदन योजना ले संवरिस दुर्ग के दुर्गेश्वरी के भविष्य, सिलाई मशीन बिसाके बनिस आत्मनिर्भर

दुर्ग, छत्तीसगढ़ शासन के महतारी वंदन योजना ह जरूरतमंद परिवार मन के जीवन म बड़े बदलाव लानत हे। दुर्ग जिला के भरर गांव के रहवइया श्रीमती दुर्गेश्वरी धीवर के जीवन म घलो ए योजना ह उम्मीद के नवा किरन लेके आए हे। छोट-छोट लइका मन के परवरिश अउ घर के जिम्मेदारी के सेती दुर्गेश्वरी बर घर ले बाहर जाके मजदूरी या कोई अउ काम करना संभव नइ रहिस। परिवार के सहारा बने अउ आय के साधन शुरू करे के इच्छा रहिस, फेर साधन के कमी बाधा बनत रहिस। मार्च 2024 म महतारी वंदन योजना के शुरुआत होए के बाद ओला नियमित आर्थिक सहायता मिलना सुरु हो गे। दुर्गेश्वरी ह ए राशि ला घरेलू खरचा म खतम करे के बजाय भविष्य संवारे बर बचत करे के फैसला लीस। ओ ह हर महीना मिलइया राशि म ले थोड़ा-थोड़ा बचत करिस अउ सिलाई मशीन बिसाइस। एकर बाद ओ ह घर ले ही सिलाई के काम शुरू कर दीस। आज दुर्गेश्वरी अपन गांव अउ आसपास के क्षेत्र ले स्कूल यूनिफॉर्म सिलाई के आर्डर लेवत हे। घर के जिम्मेदारी के संग ओ ह अपन काम ला आगे बढ़ावत हे अउ परिवार के जरूरत पूरा करे म आर्थिक सहयोग देत हे। दुर्गेश्वरी ह मुख्यमंत्री विष्णुदेव साय के प्रति आभार जतावत कहिस के महतारी वंदन योजना ओखर बर सिरिफ आर्थिक सहायता नो हे, भलुक आत्मनिर्भरता के नवा सुरुआत बने हे।