मोहला-मानपुर-अंबागढ़ चौकी जिला के महतारी मन बर ‘महतारी वंदन योजना’ ह सिरिफ पइसा नइ, बल्कि लइका मन के भविष्य अउ खुद के पहिचान बनाय के माध्यम बन गे हे।
मोहला-मानपुर-अंबागढ़ चौकी, राज्य सरकार के महतारी वंदन योजना ह गांव-देहात के महतारी मन के जिनगी म बड़का बदलाव लावत हे। ए योजना ह ओखर बर आर्थिक सहारा के संग नवा उमीद बन के आगू आय हे। हर महिना मिलइया सहायता राशि ले महतारी मन अब घर के छोटे-बड़े जरूरत मन ला पूरा करे के संग अपन लइका मन के पढ़ई म घलो बढ़िया ध्यान दे पावत हें। गांव के कतको महतारी मन ए पइसा के उपयोग छोटे-मोटे स्वरोजगार जइसे सिलाई-कढ़ाई, पशुपालन या दूसर घरेलू काम म घलो करत हें, जेखर ले परिवार के आर्थिक हालत मजबूत होवत हे। मोहला-मानपुर-अंबागढ़ चौकी जिला के कतको महिला मन के जिनगी म ए योजना ह आर्थिक मदद दे के संगे-संग आत्मविश्वास अउ आत्मनिर्भरता घलो देहे हे।
ग्राम मोहला के श्रीमती पिंकी शाह ह महतारी वंदन योजना ले मिले पइसा के बढ़िया उपयोग करत हे। ओमन अपन बेटा के नाव ले हर महिना पीपीएफ (PPF) खाता म 500 रूपया जमा करत हें। एकर संगेच ओमन खुद के काम बर एक ठन सिलाई मशीन घलो बिसाए हें। अभी के समय म ओमन सिलाई-कढ़ाई के काम करके अपन आय बढ़ावत हें अउ परिवार ला आर्थिक मदद घलो देवत हें। पिंकी शाह के कहना हे के ए योजना ह ओमन ला आर्थिक रूप ले मजबूत बनाय हे अउ स्वरोजगार बर प्रोत्साहित घलो करे हे।
वइसनहे, मोहला के श्रीमती रिद्धि यादव घलो योजना के पइसा ला अपन बेटी के पढ़ई म लगावत हे। ओखर बेटी ह 12वीं कक्षा म पढ़त हे। ओमन ए पइसा ले बेटी के पढ़ाई-लिखाई अउ ट्यूशन के खरचा उठावत हें, जेखर ले बेटी के शिक्षा फेर कोनो बाधा नइ आवत हे। ओमन बताथें के महतारी वंदन योजना के राशि मिले ले अब ओमन ला अपन छोटे-छोटे जरूरत मन बर जादा चिंता नइ करे बर परय। ग्राम मोहला के ही श्रीमती नसरीन घलो ए योजना के लाभ उठावत हे। ओमन हर महिना मिलइया पइसा म ले 500 रूपया अपन बेटी के भविष्य ला सुरक्षित करे बर ‘सुकन्या समृद्धि योजना’ म जमा करत हें। एकर संगेच ओमन बेटी के पढ़ई अउ ट्यूशन म घलो ए पइसा के उपयोग करत हें।
ए प्रकार ले सरकार के महतारी वंदन योजना ह महतारी मन ला आर्थिक मजबूती देहे के संगे-संग ओमन ला अपन परिवार के सुग्घर भविष्य बर योजना बना के खरचा अउ बचत करे बर प्रेरित करत हे। योजना के बढ़िया असर ले गांव-देहात के महिला मन के जिनगी म आत्मनिर्भरता अउ आत्मविश्वास के नवा रद्दा देखात हे।
