महतारी वंदन योजना ले मजबूत होवत हे रानी करुणा के परिवार, अभी तक मिलिस 24 हजार रूपिया के मदद

बलौदा बाजार, छत्तीसगढ़ सासन कोति ले माई लोगिन मन के आर्थिक मजबूती बर चलाए जात ‘महतारी वंदन योजना’ ह राज्य के बहिन मन के जिनगी म बढ़िया बदलाव लावत हे। ए योजना ले बलौदा बाजार भाटापारा जिला के ग्राम देवरी के रहइया रानी करुणा गायकवाड़ के घर-परिवार घलो मजबूत होवत हे।
रानी करुणा ला योजना के तहत हर महीना 1,000 रूपिया के आर्थिक सहायता मिलत हे, जेकर ले ओखर रोज के जरूरत मन आसानी ले पूरा हो पावत हे। ओखर घरवाला शैलेश गायकवाड़ एक निजी प्लांट म काम करथे। कम कमाई होय के सेती परिवार के खर्चा अउ दू छोटे लइका मन के देख-रेख करना एक चुनौती रहिस। ओखर बड़े बेटी केजी-2 म पढ़त हे, अउ छोटे बेटा 18 महीना के हे।
अभी हाल म मुख्यमंत्री श्री विष्णु देव साय ह महतारी वंदन योजना के 24वां किश्त के रूप म महिला मन के बैंक खाता म 1,000 रूपिया भेजे रहिन। रानी करुणा गायकवाड़ ला घलो योजना के लाभ सरलग मिलत हे अउ अभी तक ओला कुल 24,000 रूपिया के सहायता रासि मिल गे हे। ओ ह ए पइसा के उपयोग घर के खर्चा, लइका मन के जरूरत अउ भविष्य बर बचत के रूप म करत हे।
रानी करुणा ह योजना बर खुसी जतावत कहिस के टेम म मिलइया ए मदद मध्यमवर्गीय परिवार मन बर बहुत काम के हे। ओ ह महिला मन ला आर्थिक रूप ले आत्मनिर्भर बनाए के ए पहल बर मुख्यमंत्री श्री विष्णु देव साय के आभार मानिस। ए योजना ह महिला मन के आत्मविश्वास अउ सामाजिक सम्मान ला घलो बढ़ावत हे।