महतारी वंदन योजना : श्रीमती श्यामबती ह बेटी मन के भविष्य ल दीस सुरक्षित रद्दा

कोण्डागांव, छत्तीसगढ़ सरकार के महतारी वंदन योजना ह महिला मन ल आर्थिक रूप ले मजबूत बनाय के संगे-संग ओमन ल सम्मान अउ आत्मनिर्भरता के अधार घलो देवत हे। ए योजना के बने क्रियान्वयन ले पूरा राज्य म महिला मन के जिनगी म सुग्घर बदलाव देखे बर मिलत हे। कोण्डागांव जिला के ग्राम पंचायत बनचपई के रहइया श्रीमती श्यामबती कोर्राम एकर एक ठन प्रेरक उदाहरण आय।
महतारी वंदन योजना के हितग्राही श्रीमती कोर्राम ल योजना के तहत हर महीना एक हजार रुपिया के सहायता रासि ओकर बैंक खाता म सरलग मिलत हे। ए आर्थिक मदद ले ओहा अपन रोज के जरूरत मन ल आसानी ले पूरा कर पात हे, जेकर ले ओकर मन म आत्मविश्वास अउ संतोष के भाव जागे हे।
श्रीमती कोर्राम ह बताइस के योजना ले मिले रासि के उपयोग ओहा अपन दूनों बेटी मन के बने भविष्य बर ‘सुकन्या समृद्धि योजना’ के खाता म जमा करत हे। संग म ए सहायता रासि ले पौष्टिक अहार के व्यवस्था घलो हो पात हे, जेकर ले पूरा परिवार के सेहत म सुधार आए हे। 12वीं तक पढ़े-लिखे श्रीमती श्यामबती कोर्राम बर महतारी वंदन योजना आत्मनिर्भर बने बर एक मजबूत अधार बनके उभरे हे। ए योजना ह ओला सिरिफ आर्थिक सहारा ही नइ देवत हे, बल्कि समाज म सम्मान के संग जिये के भरोसा घलो देवत हे।
श्रीमती श्यामबती कोर्राम ह महतारी वंदन योजना बर मुख्यमत्री श्री विष्णुदेव साय अउ महिला अऊ बाल विकास मत्री श्रीमती लक्ष्मी राजवाड़े के आभार मानत कहिन के ए योजना ह महिला मन के जिनगी म सुरक्षा, स्वाभिमान अउ सशक्तिकरण के बड़े माध्यम बनत हे अउ महतारी मन ल अपन लइका मन के भविष्य बर निश्चिंत करत हे।