महतारी वंदन योजना बनिस फरिदा बेगम के परिवार के सहारा

रायपुर, मुख्यमंत्री श्री विष्णु देव साय के अगुवाई म महिला मन ला आत्‍मनिर्भर अउ मजबूत बनाये के लक्ष्य ले अलग-अलग जनकल्याणकारी योजना मन ला चलाय जावत हे। इही योजना मन म ले एक ‘महतारी वंदन योजना’ आय, जेखर माधयम ले प्रदेस के महिला मन ला आर्थिक मदद देके ओमन ला सनमान के जिनगी जिये बर प्रोत्साहित करे जात हे। ओही म ले एक महिला हे कोंडागांव के नहरपारा के रहइया फरिदा बेगम, जेहा महतारी वंदन योजना ले अपन परिवार के पालन-पोषण करत हे।
फरिदा बेगम ह बताइस के ओखर घरवाला के सड़क दुर्घटना म भारी एक्सीडेंट हो गे रहिस। ए दुर्घटना के सेती ओहा दिव्यांग हो गे हे अउ अब कोनो किसम के काम करे म असमर्थ हे। परिवार के आर्थिक स्थिति पहिली ले ही कमजोर रहिस, अइसन म घर के खरचा चलाना ओखर बर बहुते मुस्किल हो गे रहिस।
अइसन उल्टा बखत म घलो फरिदा बेगम ह हार नइ मानिस अउ अपन घर म एक ठन छोट कन फैंसी स्टोर चलावत हे। ए दुकान ले जो थोर-बहुत आमदनी होथे, ओही ले परिवार के गुजारा चलथे। ओहा बताइस के महतारी वंदन योजना के तहत मिलइया एक हजार रूपया हर महीना के सहायता रासि ओखर बर बड़े राहत साबित होवत हे।
फरिदा ह ए रासि ला दू-तीन महीना तक जमा करथे अउ फेर ओखर ले अपन दुकान बर सामान बिसाथे, जेखर से ओखर छोट कन बियापार ह लगातार चलत रहिथे। संगे-संग ओहा अपन बेटी के पढ़ाई म घलो मदद करत हे, जो बड़े पढ़ाई बर घर ले बाहिर रह के पढ़त हे।
फरिदा बेगम के कहना हे के ए योजना ले ओला आर्थिक सहारा मिले हे अउ मुस्किल बखत म घलो परिवार ला सम्हाले के आत्‍मविस्वास बाढ़े हे। ओहा ए मदद बर राज्य सासन, महिला एवं बाल विकास विभाग अउ मुख्यमंत्री श्री विष्णु देव साय के आभार जताए हे।