महतारी वंदन योजना बनिस महिला मन के बड़का संबल, घर-परिवार अउ लइका मन के भविष्य ला मिलत हे सहारा

CHHATTISGARHI NEWS: सरगुजा। छत्तीसगढ़ सरकार के महतारी वंदन योजना के तहत पात्र विवाहित महिला मन ला हर महिना 1 हजार रूपिया के आर्थिक सहायता मिलत हे, जेकर से उंकर रोज के खरचा, लइका मन के पढ़इ, पोसन अउ परिवार के जरूरत मन ला पूरा करे म बड़का सहारा मिलत हे। ए नियमित सहायता ले महिला मन ला हर छोटे-मोटे जरूरत खातिर दूसर ऊपर निर्भर रहे के जरूरत नइ परय, अउ उंकर आर्थिक आत्मविश्वास मजबूत होवत हे।
सरगुजा जिला के कर्रा गांव के श्रीमती राखी के कहानी एखर बड़का मिसाल हे। पदर साल पति के सरग सिधारे के बाद दू ठी लइका के जिम्मेदारी संभालत राखी ह ए योजना के पइसा अउ अपन सिलाई अउ खेती के काम के जरिये परिवार ला संभालत हे। महतारी वंदन योजना के राशि ले वोला लइका मन के पोसन अउ सिलाई समान बिसाए म मदद मिलत हे।
ए योजना के राशि सीधा महिला मन के खाता म आथे, जेकर से उमन परिवार के जरूरत के हिसाब से निर्णय लेथें। महतारी वंदन योजना सिरिफ एक हजार रूपिया के मदद नो हे, बल्कि ए ह महिला मन के आर्थिक सशक्तिकरण, आत्मनिर्भरता अउ परिवार के भविष्य ला संवारे के एक बड़का भरोसा बन चुके हे।