इंडियन इस्पात म बड़का हादसा, 13 श्रमिक झुलसिस, 3 के हालत गंभीर

धरसीवां, 8 जुलाई 2020। रावाभाटा के बंजारी मन्दिर के तिर स्थित इंडियन इस्पात नामक फैक्ट्री म मंगलवार के होय एक हादसा म 13 मजदूर झुलस गे हे, जोन म ले तीन के हालत गंभीर बताये जावत हे। सबो घायल मन ल रायपुर के निजी अस्पताल म भर्ती करे गे हे। मामला के जांच करत बंजारी चौकी प्रभारी सुनील सिंह ह बताइस कि कंपनी म हादसा बिहनिया वो बेरा होइस, जोन समय फर्निश म ईंगार्ड निर्माण के काम चलत रहिस, तभे भट्टी ले गरम लोहा ले जाने वाला लेडल टूट के नीचे गिरगे, जेखर ले चारों डहर आगी फइलगे अउ उहँचे काम करने वाला 13 मजदूर आगी के चपेट म आगे। घटना के बाद सबो ल रायपुर के निजी अस्पताल म भर्ती करे गे हे जिहां तीन के हालत नाजुक बने हे। चौकी प्रभारी के अनुसार ये हादसा कंपनी द्वारा मशीन मन के सही रख रखाव नई करे के सेती ले होय हे। मामला म कंपनी प्रबंधन के खिलाफ लापरवाही के मामला दर्ज करे गे हे।