मखाना के खेती बनिस महिला मन खातिर बढ़ोतरी के आधार

धमतरी, मखाना के आधुनिक खेती किसान मन अऊ महिला स्व-सहायता समूह मन खातिर आय बढ़ाए के नवा रद्दा बनत हे। ये उदीम आर्थिक रूप ले लाभकारी हे संगेच स्वास्थ्य के दृष्टि ले घलोक समाज ल नवा दिशा देवत हे। प्रशासन के उद्देश्य हे के अवइया बछर म मखाना खेती ल बड़का पैमाना म प्रोत्साहित करके किसान मन ल धान के बेहतर विकल्प के रूप म उपलब्ध कराए जाय।
धमतरी म सुपर फूड मखाना, जेन ल काला हीरा घलोक कहे जाथे, ले अपन पहिचान बनावत हे। स्वास्थ्यवर्धक अऊ पोषक तत्व मन ले भरपूर मखाना के खेती ह जिला के किसान अऊ महिला स्व-सहायता समूह मन के जीवन म नवा भरोसा जगा देहे हे। जिला प्रशासन ह एला प्राथमिकता देवत धान के खेती के विकल्प के रूप म विकसित करे के संकल्प लेहे हे, ताकि किसान मन के आमदनी दुगुना हो सकय अऊ ग्रामीण आजीविका ल मजबूती मिलय।
कुरूद विकासखंड के ग्राम राखी, दरगहन अऊ सरसोंपुरी ल पायलट प्रोजेक्ट के रूप म चुने गए हे। ए गांव मन के तालाब मन म लगभग 20 हेक्टेयर क्षेत्र म मखाना के खेती करे जात हे। राखी गांव म करीब 5 हेक्टेयर क्षेत्र के फसल अब तैयार होके हार्वेस्टिंग के चरण म पहुँच गे हे। कटाई-छंटाई के ये काम प्रशिक्षित मजदूर मन के मदद ले करे जात हे काबर के मखाना के फसल म विशेष दक्षता के जरूरत होथे।
मखाना केवल आर्थिक दृष्टि ले ही न ही बल्कि स्वास्थ्य के लिहाज ले घलोक अमूल्य वरदान हे। ये मां विटामिन, कैल्शियम, मैग्निशियम, आयरन, जिंक अऊ फाइबर भरपूर मात्रा म पाए जाथे। ये डायबिटीज अऊ हृदय रोगी मन खातिर उपयोगी हे, हड्डि अऊ जोड़ मन के दरद म राहत देथे, रात के सेवन करे म बनेच नींद अऊ तनाव मुक्ति देथे अऊ प्रोटीन अऊ फास्फोरस ले भरपूर होए के सेती शरीर ल ऊर्जा अऊ मजबूती देथे।
ए नवा उदीम ह गांव मन म उत्साह के वातावरण बना देहे हे। खासकर येमा महिला स्वसहायता समूह मन के भागीदारी उल्लेखनीय हे। ग्राम देमार के शैलपुत्री महिला समूह अऊ नवा किरण महिला समूह ह मखाना के खेती अऊ प्रसंस्करण के प्रशिक्षण लेके एला आजीविका के साधन बनाना शुरू कर देहे हे। महिला मन के ये भागीदारी ओ मन ल आर्थिक रूप ले आत्मनिर्भर बनावत हे संगेच पूरा परिवार के जीवनशैली म सुधार लाय के माध्यम घलोक बनत हे। तकनीकी मार्गदर्शन खातिर कृषि विस्तार अधिकारी अऊ इंदिरा गांधी कृषि विश्वविद्यालय, रायपुर के विशेषज्ञ सरलग किसान मन के संग जुड़े हें। तालाब मन म केवल 2 ले 3 फीट पानी म ये फसल आसानी ले तैयार हो जाथे अऊ लगभग छै महीना म कटाई लइक हो जाथे। लाभ के लिहाज ले घलोक मखाना धान ले कहूं जादा फायदेमंद साबित होवत हे। धान के खेती म जिहां औसत शुद्ध लाभ 32 हज़ार 698 रूपिया आवत हे, उहें मखाना के खेती ले किसान मन ल लगभग 64 हज़ार रूपिया तक के आमदनी होवत हे। एकरे सेती जिला प्रशासन ह किसान मन के बाढ़त रुचि ल देखत अवइया रबी सीजन म 200 एकड़ तालाब मन म मखाना के खेती विस्तार के लक्ष्य निरधारित करे हे।