कोण्डागांव के सुदूर अंचल कोंनगुड़ म ‘मक्का महोत्सव‘ के कलेक्टर ह करिन उद्घाटन

मक्का के उत्पादन ले होही किसान मन ल दुगुना फायदा – कलेक्टर

कोण्डागांव, जिला के सबले दुरिहा के गांव मन म ले एक कोंनगुड़ म आज जिला के कलेक्टर श्री नीलकंठ टीकाम कोति ले ‘मक्का महोत्सव‘ के शुभारंभ करे गीस। इहां कोंनगुड़ के अलावा कन्हारगांव बोकराबेड़ा, कोण्डापखना, बड़गई, बारदा के किसान मक्का के विक्रय बर जमा होइन। कलेक्टर ह ये महोत्सव म विक्रय बर आये किसान मन के स्वागत करके ओ मन ल नगद भुगतान अउ सम्मान चिन्ह प्रदान करके ये महोत्सव ल सुरू करिन। कलेक्टर ह किसान मन ल मक्का उत्पादन के लाभ ले अवगत करात कहिन कि मक्का एक नगदी फसल ये जऊन किसान मन ल दुनों हाथ ले लाभ के अर्जन कराही।