- स्कूल, आश्रम-छात्रावास, पैरा-मिलेट्री कैंप मन म घलोक मलेरिया के सघन जांच, पॉजिटिव्ह पाए जाय म जल्दी इलाज
- 15 जनवरी ले 14 फरवरी तक मलेरियामुक्त बस्तर अभियान, स्वास्थ्य विभाग के 1,720 टीम पहुंचही 1,823 गांव मन म
रायपुर, स्वास्थ्य विभाग के टीम पौने तीन लाख ले जादा घर मन म पहुंचके करीबन 14 लाख मनखे मन के खून के जांच करके मलेरिया पाए जाय म जल्दी इलाज करही। हर घर के संगेच स्कूल, आश्रम-छात्रावास अऊ पैरा-मिलेट्री कैंप मन म घलोक मलेरिया के जांच करे जाही। बस्तर ल मलेरिया मुक्त करे स्वास्थ्य विभाग कोति ले 15 जनवरी ले 14 फरवरी 2020 तक ‘मलेरियामुक्त बस्तर अभियान’ चलाए जाही।
बस्तर संभाग के 26 विकासखंड म ये गहन अभियान संचालित करे जाही। दंतेवाड़ा, बीजापुर, सुकमा अऊ नारायणपुर जिला के सबो विकासखंड मन म अऊ बस्तर जिला के बड़े किलेपाल, तोकापाल अउ दरभा विकासखंड के पूरा क्षेत्र म व लोहंडीगुड़ा, नानगूर अऊ बस्तर विकासखंड के 15 उपस्वास्थ्य केंद्र मन म, कांकेर के भानुप्रतापपुर, दुर्गकोंदल अऊ कोयलीबेड़ा के 10 उपस्वास्थ्य केंद्र मन म अउ कोंडागांव जिला के माकड़ी, केशकाल, कोंडागांव अऊ फरसगांव विकासखंड के 14 उपस्वास्थ्य केंद्र मन के अंतर्गत अवइया क्षेत्र म ये अभियान चलाए जाही। संभाग के 26 विकासखंड के कुल 430 उपस्वास्थ्य केन्द्र मन के माध्यम ले एक हजार 823 गांव मन म मलेरिया के पहिचान अऊ इलाज करे जाही।
