रायपुर, 11 मार्च 2020। स्वास्थ्य विभाग ह बस्तर ल मलेरिया, एनीमिया अऊ कुपोषण ले मुक्त करे बर करीबन दू लाख 76 हजार घर मन म दस्तक देहे हे। स्वास्थ्यकर्मी मलेरियामुक्त बस्तर अभियान के अंतर्गत 15 जनवरी ले 14 फरवरी तक लक्षणहीन अऊ लक्षण वाले मलेरिया के इलाज करे बर बस्तर संभाग के 154 छात्रावास, 500 आश्रम, 76 पोटा केबिन स्कूल अऊ अर्धसैनिक बल मन के 169 कैंप मन म घलोक पहुंचिन। मलेरिया के पहिचान बर ये दौरान कुल 14 लाख पांच हजार 610 मनखे मन के खून के जांच करे गीस। बस्तर संभाग के मलेरिया प्रभावित क्षेत्र मन म मलेरिया परजीवी ल समूल नष्ट करे बर व्यापक अभियान वो क्षेत्र मन म संचालित करे गीस जिहां वार्षिक परजीवी सूचकांक 10 ले जादा हे। दंतेवाड़ा, बीजापुर, सुकमा अऊ नारायणपुर जिला के सबो विकासखंड, बस्तर जिला के तीन विकासखंड बड़े किलेपाल, तोकापाल व दरभा अऊ कांकेर अउ कोंडागांव के 39 उपस्वास्थ्य केन्द्र मन म ये अभियान संचालित करे गीस। बस्तर संभाग के कुल 26 विकासखंड मन म घर-घर जाके मलेरिया के स्क्रीनिंग अउ इलाज करे गीस। श्रीलंका ल जइसे मलेरियामुक्त करे बर व्यापक अभियान चलाय गए रहिस, वोकरे तर्ज म ये गहन अभियान बस्तर म संचालित करे गीस। एकर दूसर चरण अवइया मई-जून महीना म चलाए जाही।
मलेरियामुक्त बस्तर अभियान म स्वास्थ्य विभाग पहुंचिस 2.76 लाख घर मन म
