कोण्डागांव, 18 जून 2021। 15 जून ले जिला म मलेरिया मुक्त छत्तीसगढ़ अभियान के शुरूआत के बाद पूरा जिला म अभियान लउहे-लउहे चलाए जात हे। एखर तहत् बुधवार के कलेक्टर पुष्पेन्द्र कुमार मीणा के निर्देश म मलेरिया सर्वेक्षण दल केशकाल विकासखण्ड के पहुंच विहीन ग्राम कोटोड़ी पहुंचिन। ये दल के संग मुख्य चिकित्सा अऊ स्वास्थ्य अधिकारी डॉ टीआर कुँवर, जिला कार्यक्रम प्रबंधक सोनल ध्रुव अऊ आयुष नोडल डॉ सीबी वर्मा संग धनोरा सीएचसी के स्वास्थ्य कर्मचारी घलोक कोटोड़ी पहुंचिन। जिहां दल ह गांव वाले मन के घर-घर जा के मलेरिया जांच के करिन संगेच घर के तीर-तखार म पानी के जमाव के संबंध म निरीक्षण घलोक करिन।
ये जांच के समय चार मनखे मलेरिया पॉजेटिव पाए गीस। ए सबो ल मलेरिया के दवई के पहिली खुराक तुरते शिविर स्थल म ही देहे गीस। हम आप ल बता देवन के 229 जनसंख्या वाले ये गांव म पउर साल मलेरिया जांच बर लगाए गए शिविर म 68 मनखे मलेरिया संक्रमित पाये गये रहिन। जेखर बाद स्वास्थ्य विभाग ह सरलग ये गांव म शिविर के आयोजन करत हे।
शिविर म गांव वाले मन ले चर्चा करत सीएमएचओ ह कहिन कि ये अभियान के असली उद्देश्य मलेरिया के परजीवी मन ल पनपे के पहिलिच रोके जाना अऊ संक्रमित मन के इलाज करके परजीवी मन ल मानव शरीर ले घलोक खतम करना हे ताकि छत्तीसगढ़ ले मलेरिया ल खतम करे जा सकय।
पहुंचविहीन ग्राम कोटोड़ी म मलेरिया मुक्त छत्तीसगढ़ अभियान के होइस आगाज
