राज्य म पॉजिविटी रेट 4.60 ले घटके अब 0.51 प्रतिशत
रायपुर, 15 जुलाई 2024। घना जंगल अऊ दुर्गम क्षेत्र वाले बस्तर संभाग म मलेरिया जइसे बीमारी मन के रोकथाम सुरू ले ही एक ठन बड़का चुनौती रहे हे, फेर एखर बावजूद हालात तेजी से बदले घलोक हे। मुख्यमंत्री श्री विष्णुदेव साय ह बारिश के मौसम ल देखत राज्य के स्वास्थ्य विभाग ल मलेरिया जइसे बीमारी मन के रोकथाम बर सक्रिय कदम उठाए के निर्देश देहे हें। उंखर हुकुम ले बस्तर संग पूरा राज्य म मलेरिया के मामला म उल्लेखनीय कमी आए हे, जेन एक बड़का उपलब्धि हे। ए बारिश के समय मलेरिया उन्मूलन के दिशा म प्रयास ल तेज करे के मुख्यमंत्री के निर्देश म स्वास्थ्य मंत्री श्री श्याम बिहारी जायसवाल बीजापुर जिला के दौरा म हे।
छत्तीसगढ़ के मलेरिया के कुल मामला म ले 61.99 फीसदी दंतेवाड़ा, बीजापुर, अऊ नारायणपुर ले आथे। ए जिला मन म स्वास्थ्य विभाग के सक्रियता अऊ मुख्यमंत्री के निर्देशन म करे गे काम मन ले मलेरिया के मामला म काफी कमी आए हे।
बस्तर संभाग म मलेरिया के मामला म 50 फीसदी के कमी आए हे। मलेरिया के वार्षिक परजीवी सूचकांक दर के मुताबिक, 2018 म छत्तीसगढ़ म मलेरिया के दर 2.63 फीसदी रहिस जेन 2023 म घटके 0.99 फीसदी रहि गे हे। अइसनहे बस्तर म ये दर 16.49 फीसदी ले घटके 7.78 फीसदी रहि गे हे।
मलेरिया उन्मूलन अभियान के तहत 2020 ले 2023 के समय, पहिली ले नउवां चरण तक मलेरिया धनात्मक दर 4.60 फीसदी ले घटके 0.51 फीसदी हो गे हे। ए अभियान के दसवां चरण घलोक 5 जुलाई 2024 के खतम होय हे। ए अभियान के तहत राज्य म 22 जिला मन म 16.97 लाख कीटनाशक सहित मच्छरदानी मन के वितरण घलोक करे गए हे।
स्वास्थ्य विभाग ह 2024 के पहली छमाही म मलेरिया के मामला के रिपोट जारी करे हे, जेमां बस्तर जिला म 1660 केस, बीजापुर म 4441, दंतेवाड़ा म 1640, कांकेर म 259, कोंडागांव जिला म 701, नारायणपुर जिला म 1509 अऊ सुकमा म 1144 केस दर्ज करे गए हे। ए प्रकार, स्वास्थ्य विभाग ह सबो जिला मन म मलेरिया के मामला के निगरानी बढ़ाय हे अऊ उपचार सुविधा मन ल सुदृढ़ करे बर कदम उठाए हे।
मुख्यमंत्री के निर्देश के मुताबिक, राज्य सरकार ह जनता ले अपील करे हे के मलेरिया के लक्षण दिखे म तुरंत निकटतम स्वास्थ्य केंद्र म जावव अऊ समय म उपचार करवाव। मलेरिया के मामला म आए ये कमी सरकार के सतर्कता अऊ जनता के जागरूकता के परिणाम हे।
छत्तीसगढ़ सरकार के सरलग उदीम अऊ जनसहभागिता के सेती मलेरिया उपर नियंत्रण पाय म राज्य ह महत्वपूर्ण प्रगति करे हे, जेन अवइया समय म ए बीमारी के उन्मूलन के दिशा म एक बड़का कदम हे।