दंतेवाड़ा म आयोजित मलेरिया मुक्ति बस्तर अभियान म सामिल होइन मुख्यमंत्री
रायपुर, 25 जनवरी 2020/ मुख्यमंत्री श्री भूपेश बघेल ह कहिन हे कि बस्तर दुनिया के सबले सुग्घर जगा मन म ले एक हे अऊ ओखर ले घलोक जादा सुघ्घर इहां के मनखे हें। सब कुछ इंहा के बने हे तेकर बाद घलव इहां कुछ कमी हे। एमां कुपोषण, एनीमिया अऊ मलेरिया असल हे। उमन कहिन कि मलेरिया ले पीड़ित होए म शरीर के पोषक तत्व मन म कमी आ जाथे, जेखर से एनीमिया अऊ कुपोषण जइसे समस्या पैदा होथे। कहूँ मलेरिया ल खतम कर दे जाय त एनीमिया अऊ कुपोषण ले घलोक मुक्ति मिल सकत हे। मुख्यमंत्री श्री बघेल आज दंतेवाड़ा के कारली पुलिस लाईन म आयोजित मलेरिया मुक्त बस्तर अभियान के कार्यक्रम म उपस्थित जनसमूह ल सम्बोधित करत रहिन।
मुख्यमंत्री ह कहिन कि कुपोषण ल दूर करे बर जून 2019 ले हम मुख्यमंत्री सुपोषण अभियान चलावत हन, जऊन ल आप सब मन के भागीदारी ले बनेच सफलता मिलत हे। उमन कहिन कि 15 जनवरी ले पूरा बस्तर संभाग म मलेरिया मुक्त बस्तर अभियान शुरू करे गए हे, जेमां आप सबो के भागीदारी जरूरी हे। मुख्यमंत्री ह कहिन कि मलेरिया के सबले ज्यादा बीमारी बस्तर संभाग म पाए जाथे। ए खातिर ये अभियान बस्तर ले शुरू करे गए हे। आजकल देखे म ये आए हे कि मलेरिया होए के बाद घलोक एखर लक्षण दिखाई नइ देवय। एकर सेती सबो ल चाहे बुखार होवे या झन होवे मलेरिया के जांच जरूर कराना चाही, तभे हम बस्तर ल मलेरिया मुक्त बना सकत हवन। उमन कहिन कि स्वास्थ्य कार्यकर्ता मन कठिन भौगोलिक परिस्थिति के बाद घलव हर गांव अऊ घर तक पहुंचत हें। ए कार्यकर्ता मन के सहयोग करके अभियान म भागीदार बनव। उमन मलेरिया मुक्त बस्तर अभियान म लगे सबो स्वास्थ्य कार्यकर्ता मन ल बधाई दीन। मुख्यमंत्री श्री बघेल ह कहिन कि अभियान के समय मलेरिया के जांच अऊ उपचार तो होतेच हे। ये वाले कोसिस तको करे जाना चाही कि मलेरिया होवेच झन। एखर बर घर के तीर तखार म सफाई अऊ मच्छर के लार्वा ल नष्ट करव। एखर संगेच सबो मनखे मच्छरदानी लगाके सुते के आदत डालव। मुख्यमंत्री ह कार्यक्रम म उपस्थित सबो मनखे मन ल मलेरिया मुक्त बस्तर बनाए के शपथ देवाइन।
