कापसखुटी के कुपोषित बालक होइस कुपोषण मुक्त
उत्तर बस्तर कांकेर, 04 जून 2020। जिला म नोवल कोरोना वायरस के संगे-संग कुपोषण ले घलोक लड़ई लड़े जात हे। कुपोषित लइका मन ल सामुदायिक स्वास्थ्य केन्द्र के पोषण पुनर्वास केन्द्र मन म भर्ती करके उंखर देखभाल अउ जरूरी उपचार अऊ चिकित्सा सलाह ले कुपोषित लइका मन ल कुपोषण मुक्त करे जात हे। एखर बर माता मन ल पौष्टिक भोजन बनाए के संगेच पौष्टिक आहार के जानकारी, बीमारी मन ले बचाव अऊ साफ सफाई आदि के संबंध म काउंसलिंग के माध्यम ले जानकारी देहे जात हे।
नरहरपुर विकासखण्ड ग्राम कापसखुटी के एक बछर के बालक योगेन्द्र कुंजाम अब कुपोषण ले मुक्त हो गे हे। वोखर दाई श्रीमती रामेश्वरी कुंजाम अऊ पिता श्री त्रिभुवन कुंजाम ह बताइस के योगेन्द्र गंभीर रूप ले कुपोषित होए के सेती बहुतेच कमजोर हो गए रहिस, बहुत प्रयास के बाद घलोव योगेन्द्र के वजन नइ बाढ़त रहिस, जऊन ल देखके हम अड़बड़ दुखी हो गये रहेन। लइका के कमजोर होए के जानकारी आंगनबाड़ी कार्यकर्ता ल देहे गीस अऊ वोखर सलाह म ओला 16 मई के पोषण पुनर्वास केंद्र नरहरपुर म भर्ती करे गीस, जिहां ओला 15 दिन तक बीएमओ डॉ. प्रशांत सिंह अउ फीडिंग डेमोनस्ट्रेटर प्रियंका सोनबेर के देख-रेख म ईलाज करके विशेष पौष्टिक आहार, माता ल पौष्टिक भोजन बनाए, बीमारी मन ले बचाव, साफ सफाई आदि, के रोजेच काउंसलिंग करे गीस, जेखर से लइका के वजन बाढि़स अऊ पहिली ले स्वस्थ होइस। भर्ती के समय लइका के वजन बहुत ही कम 5.5 किलो रहिस, डिस्चार्ज के समय ओखर वनज बाढ़के 6.3 किलो हो गीस।
अपन लइका ल देखके माता राजेश्वरी कुंजाम अब बहुत खुश हे अऊ ओखर जानकारी म अवइया सबो कुपोषित लइका मन ल पोषण पुनर्वास केंद्र म भेजे के बात कहत हे। वो ह कुपोषित लइका मन के माता मन ले घलोक अपील करे हे के ओ मन अपन लइका मन ल पोषण पुनर्वास केन्द्र म भर्ती करके कुपोषण ले मुक्ति पावयं। जानबा हे के कांकेर जिला के पोषण पुनर्वास केन्द्र मन म एक साल के भीतर 1114 लइका मन ल कुपोषण मुक्त करे जा चुके हे।