कोरबा, श्रीमती फुलवा ह कुपोषण अऊ अनीमिया उपर विजय पाके एक स्वस्थ बालक ल जनम देहे हे। जिला कोरबा के लबेद निवासी श्रीमती फुलवा गर्भावस्था के शुरूआती दिन म कुपोषण अऊ अनीमिया ले पीड़ित रहिस। ओखर हिमोग्लोबिन के स्तर घलोक अड़बड़ कम हो गए रहिस। मुख्यमंत्री सुपोषण अभियान के तहत ओला आंगनबाड़ी केंद्र म गर्भवती महिला मन ल देहे जाने वाला अण्डा, मूंगफली लड्डू, दूध, पापड़, आचार, चिक्की अऊ० आन पौष्टिक आहार दे गीस। जेखर से गर्भवती फुलवा के हीमोग्लोबिन के स्तर प्रसव के समय बाढ़के 10 ग्राम अऊ वजन 49 किलोग्राम हो गए रहिस। जनम के समय लइका के वजन साढ़े तीन किलोग्राम रहिस।
सुपोषण अभियान के तहत राज्य म कुपोषण मुक्ति बर अभियान चलाय जात हे। एखर से कुपोषण के दर म बनेच गिरावट आए हे। अभियान के तहत कुपोषण ल कम करे बर कई प्रकार के गतिविधि घलोक आयोजित करे जात हे। सबो हितग्राही मन ल गरम भोजन के संग रेडी-टु-ईट देहे जात हे। आंगनबाड़ी कार्यकर्ता अऊ स्वास्थ्य कार्यकर्ता मन नियमित रूप से गृह भेंट करके हितग्राही मन ल व्यक्तिगत साफ-सफाई, स्वास्थ्य जांच अऊ पौष्टिक आहार के संबंध म जागरूक करे जात हे। महिला अऊ बाल विकास विभाग कोरबा जिला के कार्यक्रम अधिकारी ह बताइस कि पंजीयन के समय फुलवा के वजन करीबन 37 किलोग्राम रहिस अऊ ओखर हीमोग्लोबिन स्तर घलोक बहुत कम रहिस। आंगनबाड़ी कार्यकर्ता मन अऊ सेक्टर पर्यवेक्षक मन फुलवा के घर जाके महतारी जतन के बारे म बताए के संगेच रोजेच आंगनबाड़ी केन्द्र म भोजन करे बर बलाए गीस। फुलवा ल समय-समय म खाए-पीए अऊ साफ-सफाई के बारे म घलोक बताए गीस। फुलवा ल भोजन म मुनगा भाजी खाए अऊ आंगनबाड़ी केंद्र म मिलइया रेडी टू ईट फूड के फायदा के बारे म घलोक बताए गीस। ओला आयरन गोली खाए के विधि के बारे म घलोक बताए गीस। फुलवा रोजेच आंगनबाड़ी केन्द्र भोजन बर आवत रहिस। जेन दिन नइ आ पातिस ओ दिन ओ ल टिफिन म पौष्टिक आहार देहे जात रहिस। श्रीमनी फुलवा ल सबो टीका लगाय के अलावा जरूरी स्वास्थ्य जांच घलोक करवाए गीस। फुलवा के प्रसव कुदमुरा अस्पताल म होइस, जिहां वो ह एक स्वस्थ बालक ल जनम दीस।
कुपोषण अऊ अनीमिया उपर विजय पाके गर्भवती फुलवा होइस कुपोषण मुक्त
