कुपोषण ले सुपोषण: यक्ष के मुस्कान म चमकत नवा छत्तीसगढ़

शासन के जनहितकारी योजना मन ले लइका मन ल मिलत हे नवा जीवन
दुर्ग, छत्तीसगढ़ म कुपोषण के खिलाफ एक नवा क्रांति के शुरुआत होवत हे। भूख अऊ कुपोषण के बेड़ी टूटत हे, अऊ लइका मन के आंखी म उम्मीद के चमक साफ दिखाई देत हे। मुख्यमंत्री श्री विष्णु देव साय के अगुवई म सुपोषित छत्तीसगढ़ के सपना अब हकीकत बनत हे। उंखर कहना हे, के हर लइका स्वस्थ होवय, इही सच्चा सुशासन हे। महिला अउ बाल विकास मंत्री श्रीमती लक्ष्मी राजवाड़े के बताए रद्दा म ये संकल्प अब धरातल म उतरत हे।
दुर्ग के 77 ग्राम पंचायत मन ल कुपोषण मुक्‍त बनाए के लक्ष्य
दुर्ग जिला के 77 ग्राम पंचायत ल कुपोषण मुक्‍त बनाए के महत्वाकांक्षी लक्ष्य रखे गए हे। ए दिशा म ग्राम पंचायत करेला के कहानी प्रेरणादायक हे। कुछ महीना पहिली, करेला के आंगनबाड़ी केंद्र 1 म पंजीकृत बालक यक्ष मध्यम कुपोषण ले जूझत रहिस। ओखर वजन मात्र 9.8 किलोग्राम रहिस, अऊ वो घर के खाना छोड़के अस्वस्थ पैकेटबंद भोजन उपर निर्भर रहिस।
मुख्यमंत्री बाल संदर्भ योजना ह बदलीस तस्वीर
मुख्यमंत्री बाल संदर्भ योजना के तहत यक्ष के स्वास्थ्य परीक्षण होइस, जेन ह ओखर जीवन म बदलाव के शुरुआत करिस। आंगनबाड़ी कार्यकर्ता श्रीमती दुर्गेश्वरी वर्मा अऊ पर्यवेक्षक श्रीमती ममता साहू ह यक्ष के माता-पिता ल पोषण के महत्व समझाइस अऊ घरेलू तरीका ले पौष्टिक भोजन तैयार करे के विधि सिखाईस। ग्राम सरपंच डॉ. राजेश बंछोर ह पोषण खजाना योजना के अंतर्गत दाल, गुड़, अऊ मूंगफली जइसे पौष्टिक जिनिस उपलब्‍ध कराईस। जेखर से यक्ष के सेहत म अभूतपूर्व बदलाव आइस। नियमित आंगनबाड़ी केंद्र आए के बाद यक्ष म खाए के रुचि जागीस। समूह भोजन के माहौल, भिनसरहा अंकुरित अनाज, रेडी-टू-ईट पोषण आहार अऊ माँ के स्नेह ले तियार भोजन ह ओखर सेहत ल नवा दिशा दीस। आज यक्ष के वजन बढ़के 11.5 किलोग्राम अऊ लंबाई 89 सेंटीमीटर हो गए हे। वो अब पूरा सुपोषित हे। ओखर चमकत आँखी अऊ चेहरा म खिलत मुस्कान न केवल ओखर स्वास्थ्य, बल्कि नवा छत्तीसगढ़ के उज्ज्वल भविष्य के गवाही देवत हे।
परिवार ह जताइस शासन के आभार
यक्ष के परिवार ह भावुक होके शासन के आभार व्यक्त करे हे। उमन कहिन, समय म मिले ए मदद ह हमार लइका ल नवा जीवन देहे हे। कहूं ये सहायता नइ मिलतिस, त शायद हमर यक्ष आज घलोक कमजोर अऊ बीमार होतिस।
सुपोषित छत्तीसगढ़ के दिशा म बढ़त कदम
यक्ष के कहानी केवल एक लइका के न ही, भलुक छत्तीसगढ़ के उन तमाम लइका मन के कहिनी हे, जिनकर खातिर शासन के योजना जीवन म नवा रोशनी लावत हे। कुपोषण मुक्‍त छत्तीसगढ़ के ये अभियान न केवल लइका मन के सेहत सुधारत हे, बल्कि एक स्वस्थ अऊ समृद्ध भविष्य के नींव घलोक रखत हे।