राजभवन म कारिकरम के तियारी के संबंध म होइस बईठक
रायपुर, नेहा राठौर के खबर/ प्रधानमंत्री श्री नरेन्द्र मोदी जी के रेडियो कारिकरम ‘‘मन की बात‘‘ के 100वीं कड़ी के प्रसारण पूरा देश के राजभवन मन म बिसेस रूप ले करे जाही। छत्तीसगढ़ राजभवन में भी राज्यपाल श्री विश्वभूषण हरिचंदन के अध्यक्षता म ए कारिकरम आयोजित करे जाही। ए कारिकरम ह भारत सरकार के सूचना अउ प्रसारण मंत्रालय कोती ले आयोजित करे जाही। राज्यपाल के सचिव श्री अमृत खलखो ह एकर बिस्तृत रूपरेखा तियार करे अउ समन्वय के संबंध म आज इहां राजभवन म बईठक लीहिस। बइठक म राज्यपाल के निजी सचिव श्री बी. एस. बेहरा, उपसचिव श्री दीपक अग्रवाल, पत्र सूचना कारिकरम के उप संचालक श्री सुनील तिवारी, दूरदर्शन अउ आकाशवाणी केंद्र के निदेशक अउ वरिष्ठ अधिकारी उपस्थित रहिन हे।
बइठक म बताए गइस के ए संबंध म राज्य इस्तरीय समिति के गठन करे जाही। इकर अलावा राजभवन म ‘‘मन की बात‘‘ के प्रसारण ब बड़े रूप म व्यवस्था के संबंध म घलो चरचा होइस। कारिकरम म छेत्र प्रचार निदेशालय भारत सरकार कोती के ‘‘मन की बात‘‘ के पहिली के होए कारिकरम के संबंध म एक ठ बिसेस फोटो परदरसनी घलो लगाय जाही।
