मुख्यमंत्री ह नंदिनी के खाली पड़े माइंस म बने विशाल मानव निर्मित जंगल के करिन अवलोकन
दुरूग, देश म पर्यावरण के मानव निर्मित विशाल धरोहर दुर्ग जिला के नंदिनी के खाली पड़े माइंस म बने हे। इहां विशाल मानव निर्मित जंगल विकसित करे गए हे। मुख्यमंत्री श्री भूपेश बघेल ह आज नंदिनी म ये प्रोजेक्ट के अवलोकन करिन। नंदिनी के खाली पड़े खदान के जमीन म ये प्रोजेक्ट विकसित करे गए हे। करीबन 3.30 करोड़ रुपए के लागत ले ये प्रोजेक्ट तियार करे गए हे। आज जन वन कार्यकम म मुख्यमंत्री श्री बघेल ह इहां बरगद के पौधा लगाइन अऊ जंगल के अवलोकन करिन। जानबा हे के एखर बर डीएमएफ अऊ आन मद ले राशि लहे गए हे। मुख्यमंत्री श्री भूपेश बघेल के निर्देश म पर्यावरण संरक्षण बर ये प्रोजेक्ट तियार करे गए हे। ये प्रोजेक्ट देश दुनिया के आगू उदाहरण हे कि कइसे भांठा माइंस एरिया ल नेचुरल हैबिटैट के बड़का रूप म बदले जा सकत हे।
मुख्यमंत्री ह ये बेरा म अपन संबोधन म कहिन कि पर्यावरण ल संरक्षित करइया ये प्रशंसनीय कदम हे। इहां 100 एकड़ म औषधीय पौधा अऊ फलोद्यान घलोक विकसित करव। उमन कहिन कि पर्यावरण संरक्षण बर ये बड़का पहल हे। एखर से प्रदूषण ल नियंत्रित करे म घलोक मदद मिलही।
वन अऊ जलवायु बदलाव मंत्री अऊ दुर्ग जिला के प्रभारी मंत्री श्री मोहम्मद अकबर ह कहिन कि हमन प्रकृति ल सहेजे के बड़का निर्णय लेहे हन। चाहे लेमरू प्रोजेक्ट हो या नदिया मन के करार म प्लांटेशन, प्रकृति ल हमन हमेशा तवज्जो देहे हन। इहां मानव निर्मित जंगल के बड़का काम होय हे। मैं एखर बर क्षेत्र के जनता ल बधाई देवत हंव।
