मनखे-मनखे एक समान के संदेश ल जीवन म उतारने के जरूरत : मुख्यमंत्री श्री भूपेश बघेल

रायपुर, मुख्यमंत्री श्री भूपेश बघेल ह 18 दिसम्बर के बाबा गुरू घासीदास के जयंती के एक दिन पहिली राजधानी रायपुर के न्यू राजेन्द्र नगर म आयोजित सार्वजनिक गुरू घासीदास जयंती समारोह म सामिल होइन। उमन कहिन कि मानव जाति के उत्थान म संत बाबा गुरू घासीदास जी के जीवन अनुकरणीय हे। हम सबो ल ऊंखर बताए ’मनखे-मनखे एक समान’ के संदेश ल जीवन म उतारे के जरूरत हे। उमन कहिन कि सत्य के रद्दा म चलके मानवता के हित म काम करना चाही। साधु-संत अऊ महापुरूष मन के बताए रद्दा म चलके छत्तीसगढ़ सरकार के आज 3 साल पूरा होवत हे। बाबा गुरुघासीदास जी के आशीर्वाद हे कि ओ मन ल छत्तीसगढ़ महतारी के सेवा के सौभाग्य प्राप्त होइस। ऊंखरे आशीर्वाद ले सबो मनखे मन के कल्याण अऊ छत्तीसगढ़ के विकास के काम करे जात हे। मुख्यमंत्री श्री बघेल ह इहां जैतखाम के पूजा अर्चना करिन अऊ आरती म भाग लीन। समाज के मनखे मन ह मुख्यमंत्री श्री बघेल ल जैतखंभ स्मृति चिन्ह भेट करिन। मुख्यमंत्री ह ये मौका म राजेन्द्र नगर स्थित सामाजिक भवन म पुस्तकालय अउ कम्प्यूटर बर 50 लाख रूपिया देहे के घोषणा करिन।