मानदेय बढ़ाए ले राधिका ह उत्साहित होके मुख्यमंत्री ल दीस बधाई

उत्तर बस्तर कांकेर, कांकेर सीमा ले लगे ग्राम व्यासकोंगेरा के आंगनबाड़ी म कार्यकर्ता के पद म पदस्थ श्रीमती राधिका कुंजाम आंगनबाड़ी के लइका मन ल संस्कार अऊ संस्कृति सिखाथे। इही शिक्षा लइका मन के जीवन ल संवारे म सहायक होही। मानदेय बढ़ाए ले ब्यासकोंगेरा के कार्यकर्ता श्रीमती राधिका कुंजाम ह उत्साहित होके प्रदेश के मुख्यमंत्री श्री भूपेश बघेल ल कोटि-कोटि बधाई दीए हे।

श्रीमती राधिका ह बताइस कि मानदेय बाढ़े ले वो बहुत खुश हे अऊ अपन दुनों बेटी मन ल पढ़ाए म आर्थिक मदद घलोक मिलही। राधिका बताथे कि वोकर छोटे बिटिया रूपाली कुंजाम ल डॉ. सी.व्ही. रमन पी.जी. गर्ल्स कॉलेज दुर्ग म बी.एस.सी. म पढा़वत हे अऊ वोकर बड़े बेटी एम.ए. हिन्दी पी.जी कॉलेज कांकेर म पढ़त हे।

वो बताइस कि आंगनबाड़ी कार्यकर्ता के रूप म 1996 ले वो ह काम करत हे ओ समय ओखर मानदेय मात्र 250 रूपिया ले चालू होए रहिस। अब भूपेश सरकार ह 01 जुलाई 2019 ले प्रदेश के आंगनबाड़ी कार्यकर्ता मन के 1500 रूपिया अऊ सहायिका मन के 750 रूपिया मानदेय बढ़ाके बड़ राहत दीए हे। अब कार्यकर्ता मन ल 6500 रूपिया, सहायिका मन ल 3250 अऊ मिनी आंगनबाड़ी कार्यकर्ता मन ल 4500 रूपिया के मानदेय मिले लगही।

ब्यासकोंगेरा के आगंनबाड़ी सहायिका श्रीमती बिराजो बाई कुंजाम ह घलोक 1996 ले काम करना चालू करे हे। ओ समय ओ ल मात्र 150 रूपिया मानदेय मिलत रहिस, अब ओखर मानदेय 01 जुलाई ले 3250 रूपिया मिले लगही। ओ ह बहुत प्रसन्नचित हे अऊ वो ह घलोक भूपेश सरकार ल बधाई दीए हे। बिराजो बाई बताथे कि अपन लइका मन ल पढ़ाए म आर्थिक सहयोग मिलही। ब्यासकोंगेरा के आंगनबाड़ी केन्द्र म 22 लइका दर्ज हे, जेमां 04 साल के कुमारी लक्ष्मी पिता सालिक राम, 03 साल के यालिसा पिता आत्माराम अंगरेजी वर्णमाला ल धाराप्रवाह पढ़के सुनाथे, आंगनबाड़ी के आन लइका मन घलोक संस्कार अऊ संस्कृति के गाथा गढ़त हें। आंगनबाड़ी केन्द्र म 01 गर्भवती माता श्रीमती वर्षा कुंजाम अऊ 05 शिशवती माता श्रीमती अनुसुईयां, शांति, बिन्देश्वरी, सियाबत्ती अऊ समीता बाई ल पोषण आहार, रेडिटूईट, गरम भोजन आदि ले लाभान्वित होवत हें।