मनेन्द्रगढ़-चिरमिरी-भरतपुर: वर्मी खाद बेंचे ले समूह के टर्नओवर पहुंचिस 1 करोड़

मनेन्द्रगढ़-चिरमिरी-भरतपुर, छत्तीसगढ़ के गोधन न्याय योजना ह अपन शुरुआत के संगेच प्रदेश म एक नवा आर्थिक-समाजिक क्रांति के आगाज करे हे। बहुत कम समय म ये योजना ह अपन महत्ता अऊ सार्थकता साबित करके पूरा देश के ध्यान आकर्षित करे हे। ये योजना ह मनखे मन ल अकतहा आय के जरिया देहे हे अऊ महिला मन ल विशेष रूप ले रोजगार के अवसर देहे हे। छत्तीसगढ़ शासन ये योजना के तहत पशुपालक मन ले गोबर बिसावत हे। ये गोबर ले गौठान मन म स्व सहायता समूह ह वर्मी खाद बनावत हे। ये वर्मी खाद के विक्रय ले समूह मन ल लाभ होवत हे अऊ एखर से ऊंखर जीवन म बड़का बदलाव आवत हे अऊ ये बदलाव के प्रत्यक्ष गवाह हे स्वच्छ मनेन्द्रगढ़ क्षेत्र स्तरीय संघ के महिला मन।
नवा जिला मनेन्द्रगढ़-चिरमिरी-भरतपुर के अंतर्गत जिला मुख्यालय मनेन्द्रगढ़ के शहरी गौठान म वर्मी खाद निर्माण म लगे स्वच्छ मनेन्द्रगढ़ क्षेत्र स्तरीय संघ के टर्नओवर 1 करोड़ तक जा पहुंचे हे। साल 2020 म योजना के शुभारंभ के संग गौठान म गोबर खरीदी के काम शुरू होए हे। आज तक ये संघ ह 100312.12 क्विंटल वर्मी खाद बेंच डरे हे जेकर राशि 1 करोड़ 32 हज़ार रूपिया बनथे। ये मां समूह के शुद्ध लाभ 36.73 लाख रुपिया हे।
पूरा जिला म सबले जादा वर्मी खाद उत्पादन करइया विकासखण्ड मनेन्द्रगढ़ के स्वच्छ मनेन्द्रगढ़ क्षेत्र स्तरीय संघ के सदस्य सविता दास बताथे कि जब गोधन न्याय योजना शुरू होइस त वो ह शहर के गौठान म समूह के रूप म जुड़के वर्मी कम्पोस्ट निर्माण के काम शुरू करिस। जइसे-जइसे उत्पादन अउ विक्रय ले लाभ मिलीस, मनखे मन के हमार प्रति नजरिया बदले लगिस। ये योजना ले हमन ल स्वरोजगार के जरिया मिले हे अऊ वर्मी खाद विक्रय ले जेन लाभांश हमला मिले हे ओखर से मैं ह टू व्हीलर गाड़ी बिसाए हंव। सविता मुस्कुरात कहिथे कि में अपन गाड़ी म गौठान आथंव।