दुपहिया वाहन ले एक गर्भवती श्रीमती मंगलदई ल प्रसव बर लाए गीस प्राथमिक स्वास्थ्य केन्द्र
जगदलपुर, 26 अगस्त 2020। संस्थागत प्रसव ल बढ़ावा देहे बर कलेक्टर श्री रजत बंसल के मार्गदर्शन म जिला स्वास्थ्य विभाग कोति ले माँझी योजना के संचालन करे जात हे। मांझी योजना के तहत विकासखंड लोहण्डीगुड़ा अन्तगर्त ग्राम मारेंगा धनारुपारा ले एक गर्भवती महिला श्रीमती मंगलदई ल प्रसव बर प्राथमिक स्वास्थ्य केन्द्र मारडुम म दुपहिया वाहन ले श्री दसरु मंडावी ह लाइस। धनारुपारा मारेंगा म जादा बरसात के सेती नजदीकी नाला म पानी भरे रहिस तेकर सेती 102 महतारी एक्सप्रेस वाहन नइ पहुँच सकीस। त दसरू ह गर्भवती महिला ल अपन दुपहिया वाहन ले स्वास्थ्य केंद्र तक सकुशल पहुँचाइस। स्वास्थ्य केंद्र म गर्भवती महिला सामान्य अऊ सुरक्षित प्रसव के बाद जच्चा-बच्चा दुनों स्वस्थ हे।
दुपहिया वाहन ले स्वास्थ्य केंद्र तक गर्भवती महिला लवइया दसरु मंडावी ल मान्झी योजना के तहत दूरी के मापदंड के मुताबिक प्रोत्साहन स्वरूप नगद राशि 400 रूपिया खंड चिकित्सा अधिकारी लोहण्डीगुडा डॉ. नारायण नाग ह दीन। धनारुपारा ले प्राथमिक स्वास्थ्य केन्द्र मारडुम के दूरी 9 किलोमीटर हे। मांझी योजना के प्रचार-प्रसार स्वास्थ्य कार्यकर्ता अऊ मितानिन मन सरलग करत हें। एकर से गर्भवती महिला मन के स्वास्थ्य के सक्छा होवत हे।
