मनरेगा ले आपदा ल अवसर म बदल दीन महुदा के महिला मन ह

जांजगीर-चांपा, 27 नवम्बर 2020। कोरोना महामारी ह देश-दुनिया के अर्थव्यवस्था के संगे-संग आम आदमी के आर्थिक स्थिति ल घलोक अड़बड़ नुकसान पहुँचाए हे। एक कोति लॉकडाउन म मनखे मन के रोजगार उपर संकट छाइस, त उहें अनलॉक होए के बाद घलोक मनखे मन ल उंखर क्षमता के मुताबिक काम नइ मिलत रहिस। ए सब के बावजूद देश म अइसन कई उदाहरण हे, जेमन कोरोना महामारी जइसे आपदा ल अवसर म बदले हें अऊ अपन संगे-संग अपन ले जुड़े मनखे मन के आजीविका बर नवा रद्दा बनाये हें। एकर प्रत्यक्ष उदाहरण जय माँ कंकाली महिला स्व सहायता समूह के महिला मन हें, जेमन लॉकडाउन ले अनलॉक के अवधि म रोजी-रोटी के समस्या उत्पन्न होए म घलोक हार नइ मानिन अऊ अपन मजबूत इरादा अऊ दृढ़ इच्छाशक्ति के बदौलत गाँव म रेशम विभाग कोति ले महात्मा गांधी नरेगा मद ले कराए गए अर्जुन वृक्षारोपण म कोसाफल अऊ अंतरवर्तीय सब्जी उत्पादन करके, लाभ कमाए के संगे-संग अपन परिवार के भरण-पोषण म मदद घलोक करत हें।