कोरबा, महात्मा गांधी राष्ट्रीय ग्रामीण रोजगार गारंटी योजना ले कोरबा जिला के किसान मंगल सिंह कंवर ल आगू बढ़े के नवा रद्दा मिल गे। मनरेगा के तहत मंगल सिंह के घर-बाड़ी म नवा कुंआ खोदाए हे अऊ ये कुंवा ले मंगल सिंह ह अपन कोला बारी म सब्जी उपजा के 50 हजार रूपिया के अकतहा आमदनी करे हे। मंगल के बताती कटघोरा विकासखण्ड के ग्राम पंचायत सलोरा के सिरबिदा गांव म ओ ह पहिली मनरेगा मजदूर के रूप म रोजी-मजदूरी करत रहिस। जमीन समतलीकरण, तालाब गहरीकरण जइसन कई काम मन म वो ह कई बछर ले मजदूरी करे हे। अकुशल श्रमिक के रूप म ओ ल मनरेगा के निरधारित मजदूरी घलोक मिलत रहिस। फेर ये राशि घर परिवार के भरण-पोषण बर पूर नइ परत रहिस।
मंगल सिंह बताइस के वो ह अपन घर ले लगे बाड़ी म कुंआ खोदवाए बर मनरेगा के तहत पंचायत म आवेदन दीस। पंचायत प्रस्ताव के मंजूरी मिलतेच मंगल सिंह के घर-बाड़ी म साढ़े आठ मीटर गहिर अऊ करीबन साढ़े चार मीटर चौड़ा कुंआ खोदे गीस। कुंवा के पक्की जगत घलोक बनाए गीस। मंगल सिंह के कुंआ खोदे के काम ले गांव वाले मन ल घलोक रोजगार मिलीस। मंगल सिंह के बाड़ी म ये कुंवा ल खोदे म करीबन 72 हजार रूपिया के शासकीय व्यय होइस। आज ये कुंवा म बहुत पानी हे अऊ ये पानी ले ही सिंचाई करके मंगल सिंह अपन बाड़ी म सब्जी के उत्पादन करत हे। वो ह पाछू सीजन म आलू, प्याज, बैंगन, टमाटर, हरि मिर्च, मूली, भाजी, जइसे साग-सब्जी उगाए रहिस अऊ ओ ल स्थानीय बाजार म बेचके करीबन 50 हजार रूपिया के अकतहा आय प्राप्त करे हे। मंगल सिंह के बताती कुंआ बन जाय के बाद ओ ल बाड़ी के संग लगे खेत म घलोक जरूरत के हिसाब ले धान अऊ गेहूं के फसल बर सिंचाई के पानी मिलत हे। एखर से वोखर फसल घलोक बनेच होवत हे।
नवा छत्तीसगढ़ के 36 महिना: मनरेगा के कुंवा ले निकलिस अमदानी के धार, मंगल सिंह ल बारी म सब्जी उपजाए म होइस 50 हजार रूपिया के अकतहा आमदनी
