सामान्य प्रशासन विभाग ह जारी करिस हुकुम
रायपुर, मंत्रालय अऊ जम्मो विभाग के कार्यालय मन के संचालन मंगल 08 फरवरी 2022 ले सबो श्रेणी के अधिकारी-कर्मचारी मन के शत्-प्रतिशत उपस्थिति के संग होही। सामान्य प्रशासन विभाग कोति ले कोविड-19 के अभी हाल स्थिति ल ध्यान म रखत आज मंत्रालय महानदी भवन ले ये बात के हुकुम जारी कर देहे हे। एखर पहिली मंत्रालय अऊ विभागाध्यक्ष कार्यालय मन म 50 प्रतिशत उपस्थिति के हुकुम देहे गए रहिस।
सामान्य प्रशासन विभाग कोति ले छत्तीसगढ़ शासन के जम्मो विभाग के सबो अपर मुख्य सचिव, प्रमुख सचिव, सचिव अऊ जम्मो विभाग के बड़े साहेब मन ल जारी हुकुम म कहे गए हे के कोविड-19 के अभी हाल स्थिति ल ध्यान म रखत, आम जनता के काम मन के लउहे निपटारा करे बर मंत्रालय अऊ जम्मो विभाग के बड़े साहेब मन के कार्यालय मन म शासकीय काम के संचालन बर मंगलवार 08 फरवरी 2022 ले सबो अधिकारी-कर्मचारी मन के शत्-प्रतिशत हाजिरी ठउका करे जाय। जम्मो अधिकारी-कर्मचारी कोविड-19 संक्रमण के बचाव बर समय-समय म जारी दिशा-निर्देश के अनिवार्य रूप ले पालन करयं। सबो अधिकारी-कर्मचारी कोविड-19 के संक्रमण के रोकथाम बर निरधारित मापदण्ड जइसे- मास्क लगाना, एक-दूसर ले दूरी बनाए रखना, सेनिटाइजर के समय-समय म उपयोग करना आदि मापदण्ड के कड़ाई ले पालन करयं।
