रइपुर, 01 सितम्बर 2021 बुधवार। नगरीय प्रशासन अउ विकास अउ श्रम मंत्री डॉ. शिवकुमार डहरिया ह आरंग विकासखण्ड के अंतर्गत ग्राम अमोदी म चौपाल लगाके ग्रामीण अउ जनप्रतिनिधि मन ले मुलाकात करीन। उन कहीन कि छत्तीसगढ़ सरकार सरलग विकास कार्य के माध्यम ले प्रदेश के विकास करत हे। किसान मन के हित सरलग फैसला लेवत हे। राजीव गांधी किसान न्याय योजना ले किसान मन ल लाभान्वित करे जावत हे। गोबर खरीदी ले पशुपालक मन ल तको आर्थिक लाभ पहुचावत उन्कर जीवन स्तर बदलत हावय। उन मन आरंग विधानसभा क्षेत्र के ग्राम पंचायत मन म तको सरलग कार्य स्वीकृत करके तस्वीर बदले के बात कहीन। अधिकांश ग्राम पंचायत मन म सीसी रोड़, नाली निर्माण, सामुदायिक भवन, रंगमंच संग आनी बानी के विकास कार्य कराए गे हवय। अवइया दिन मन म अइसने विकास कार्य जारी रहिही। समोदा, मंदिर हसौद अउ चंदखुरी ल नगर पंचायत बनाके ये क्षेत्र म विकास के द्वार खोले गे हे। उन मन ग्राम अमोदी म जनप्रतिनिधि मन के शिकायत सुनीन अउ ओला निराकृत करे बर अधिकारी मन ल आवश्यक निर्देश दीन। इहां उन अलग-अलग मुहल्ला मन म दू ठिन रंगमंच के घोषणा करीन। माइलोगन मन के पेयजल समस्या के शिकायत करे म मंत्री डॉ. डहरिया सबो घर म नल कनेक्शन लगे के बाद पानी के समस्या दूर होए के जानकारी दीन।
मंत्री डॉ. डहरिया ह लगाईन ग्राम अमोदी म चौपाल : दू ठिन रंगमंच के घोषणा करीन
