- मनवा कुर्मी क्षत्रिय समाज कोति ले डॉ. खूबचंद बघेल जयंती के आयोजन
- छत्तीसगढ़ी फिल्म के पुरोधा श्री मनु नायक ल माटीपुत्र सम्मान देहे गीस
रायपुर, राष्ट्र के सबो हिस्सा के विकास ले ही संपूर्ण राष्ट्र के विकास संभव हे। डॉ. खूबचंद बघेल ह ये बात ल शिद्दत ले महसूस करिस अऊ पूरा मनोयोग ले छत्तीसगढ़ महतारी के सेवा अऊ छत्तीसगढ़ के विकास बर काम करिस।
मुख्यमंत्री ह कहिन कि छत्तीसगढ़ राज्य के संकल्पना ल मूर्त रूप देहे म डॉ. खूबचंद बघेल जइसे यशस्वी जननायक मन ह जऊन योगदान देहे हे वो हमेसा सुरता रहिही। मुख्यमंत्री श्री भूपेश बघेल ह ये बात भिलाई स्थित कला मंदिर म मनवा कुर्मी क्षत्रिय समाज कोति ले आयोजित डॉ. खूबचंद बघेल जयंती समारोह अऊ माटीपुत्र सम्मान समारोह म कहिन।
मुख्यमंत्री श्री बघेल ह अपन संबोधन म बैरिस्टर छेदीलाल, स्वर्गीय श्री चंदूलाल चंद्राकर जइसे पुरोधा मन ल घलोक सुरता करिन। उमन कहिन कि छत्तीसगढ़ के अइसन सबो विभूति मन के योगदान अऊ प्रेरणादायी जीवन के कहानी नवा पीढ़ी ल पढ़ाए जाना चाही ताकि उंखर आत्मगौरव अऊ बाढ़ सकय। मुख्यमंत्री ह कहिन कि ए विभूति मन ह छत्तीसगढ़ राज्य अऊ इहां के विकास ल लेके सपना देखे रहिन, अब बेरा आ गए हे कि हम सबो ल मिलके ऊंखर संकल्प ल पूरा करन। मुख्यमंत्री ह कहिन उंखर सरकार ह ये दिशा म काम घलोक सुरू कर देहे हे।
मुख्यमंत्री ह कहिन छत्तीसगढ़ के अन्नदाता मन ले देश म सबले जादा 2500 रुपिया के दर ले धान खरीदी करे गीस, किसान मन के करजा माफी करे गीस। एखर से किसान मन म उत्साह हे अऊ खेती-किसानी के प्रति उंकर रूझान बाढ़े हे। तीज तिहार, हरेली म पहली पइत शासकीय अवकाश घोषित करे ले तीजहारिन महिला मन विशेष रूप ले खुश हे। उमन कहिन माता-बहिनी मन के खुशी अऊ तरक्की ले बहुत संबल मिलथे। मुख्यमंत्री ह कहिन बीएसपी अऊ एनएमडीसी जइसे संस्थान मन म तीसर अऊ चौथा दर्जा के नियुक्ति मन म छत्तीसगढि़या मन के अधिकाधिक हिस्सेदारी होवय, ये दिशा म हमन पहल करे हवन।
मुख्यमंत्री ह ये बेरा म छत्तीसगढ़ी फिल्म के पुरोधा श्री मनु नायक ल माटीपुत्र सम्मान ले सम्मानित घलोक करिन। उमन कहिन कि मनु नायक के सम्मान करके ओ मन ल अड़बड़ खुशी होवत हे। उमन बरसों मुंबई म काम करे हें, फेर ओ मन बिल्कुल नइ बदलिन। छत्तीसगढि़या जिहां जाथे अपन माटी के सुगंध संग रखथे। अपन माटी के प्रति गहरा अनुराग उंखर संग होथे। ओ मन जब वापस आथें, उही आत्मीयता ले बोलथें, छत्तीसगढ़ी म अपन बात रखथें। छत्तीसगढ़ी सिनेमा ल बढ़ावा देहे म उंखर बहुत बड़ा योगदान हे।
मुख्यमंत्री ह उंखर ले जुड़े सुरता मन ल घलोक साझा करिन। उमन बताइन कि मनु नायक के फिल्म ‘कहि देबे संदेश’ श्रीमती इंदिरा गांधी ल घलोक पसंद आए रहिस अऊ ओ समय अविभाजित मध्यप्रदेश के मुख्यमंत्री श्री डी. पी. मिश्र ह ओला टैक्स फ्री कर देहे रहिन। ये मां मो. रफी, मन्ना डे, महेंद्र कपूर अऊ सुमन कल्याणपुर जइसे महान फनकार मन ह अपन अवाज दीए रहिस। ये बेरा म विधायक श्री देवेंद्र यादव संग आन विशिष्ट अतिथि मौजूद रहिन।
