कुम्हारी म मनवा कुर्मी क्षत्रिय समाज के सामुदायिक भवन लोकार्पित
दुर्ग, मुख्यमंत्री श्री भूपेश बघेल के माई पहुनई म काली कुम्हारी नगर पालिका क्षेत्र के वार्ड नंबर 3 म 38 लाख के लागत ले बने छत्तीसगढ़ मनवा कुर्मी क्षत्रिय समाज के सामुदायिक भवन के लोकार्पण होइस। ये बेरा म मुख्यमंत्री ह समाज के अरथ बतावत कहिन कि समाज मनखे के एक समूह भर नइ होवय भलुक मनखे म जेन पारस्परिक संबंध पाए जाथे, ओकरे एक व्यवस्था ये। कुर्मी समाज के मनखे मन के मुख्य पेशा किसानी ये, फेर शिक्षा अऊ स्वास्थ्य के क्षेत्र म घलोक समाज के मनखे मन ह अड़बड़ नाम कमाए हें। विकास के रद्दा म चले बर समाज के मनखे मन के एकता सूत्र म बंधे रहना जरूरी हे अऊ कुर्मी समाज एला भली भांति जानथे।
मुख्यमंत्री श्री बघेल ह आगू कहिन कि सबो समाज प्रगति कोतिअग्रसर होवय, एखर खातिर छत्तीसगढ़ शासन कोति ले सबो ल समान अवसर उपलब्ध कराए जात हे। समुदायिक अउ सांस्कृतिक भवन मन बर शासन रियायती दर म जमीन के आवंटन करत हे ताकि सबो समाज के मनखे अपन समुदाय के हित बर आगू आवयं अऊ उंखर उत्थान के काम करयं। ए सामुदायिक भवन मन म सामाजिक काम मन के संगें-संग समाज के मनखे मन ल आन लाभ घलोक मिलही। उमन उपस्थित समाज के मनखे मन के संग चर्चा घलोक करिन अऊ ओ मन ल समाजिक एकता अऊ अखंडता ल बनाए रखे बर बधाई घलोक दीन।
ये बेरा म नगरी प्रशासन अउ विकास मंत्री डॉ शिव कुमार डहरिया, ओएसडी श्री मनीष बंछोर, श्रीमती योगिता वर्मा, श्रीमती मीना वर्मा, श्रीमती भुनेश्वरी बघेल, श्रीमती नंदनी वर्मा श्री धनेश पटेल,श्रीओम नारायण वर्मा, श्री नारायण वर्मा, श्री विजय वर्मा, श्री दयालु राम वर्मा, श्री मनोज वर्मा अउर कुर्मी समाज के आन सदस्य व अधिकारीगण उपस्थित रहिन।
