जगदलपुर म वनाधिकार पत्र मिले ले वनांचल के बहुत अकन परिवार मन के संवरिस जिन्दगी

तोकापाल अनुविभाग के 11552 हितग्राही मन के खुशहाल जीवन अऊ अकतहा आय के बनिस जरिया

जगदलपुर 10 अगस्त 2020। मुख्यमंत्री श्री भूपेश बघेल के सियानी म छत्तीसगढ़ सरकार के जनहितैषी निर्णय के फलस्वरूप वनभूमि म कई बछर ले काबिज मनखे मन ल वनाधिकार पत्र मिले ले बस्तर जिला के बहुत अकन गरीब परिवार मन के जिन्दगी संवर गए हे। राज्य शासन के ये संवेदनशील निर्णय के सेती लंबा समय तक ये मन जमीन म काबिज होके माटी महातारी सेवा करत अपन कुटूम्ब के भरण-पोषण करत रहिन। ये भुंइया के भगवान मन ल आखिरकार जंगल जमीन के मालिकाना हक मिलिस। जेखर से वन जमीन के मालिकाना ल लेके उंखर चिंता दूर हो गीस, अब ओ मन निश्चिंत होके अपन मेहनत ले ये जमीन म सोना उपजावत हें।

ये योजना के फलस्वरूप बस्तर जिला के तोकापाल अनुविभाग के कुल 11 हजार 552 हितग्राही मन ल वनाधिकार पत्र मिले ले ये जमीन ऊंखर परिवार बर खुशहाल जीवन अऊ अकतहा आय के जरिया बन गए हे। तोकापाल राजस्व अनुविभाग के अन्तर्गत तहसील तोकापाल म व्यक्तिगत वनाधिकार पत्र के अन्तर्गत 2 हजार 719 अऊ सामुदायिक वनाधिकार पत्र के अन्तर्गत 623 संग विकासखण्ड म कुल 3 हजार 342 हितग्राही मन ल वनाधिकार पत्र वितरित करे गए हे। दरभा विकासखण्ड म व्यक्तिगत वनाधिकार पत्र के अन्तर्गत 6 हजार 763 अऊ सामुदायिक वनाधिकार पत्र के अनतर्गत 434 संग कुल 7 हजार 197 हितग्राही मन ल वनाधिकार पत्र वितरित करे गए हे। अइसनहे बास्तानार विकासखण्ड म व्यक्तिगत वनाधिकार पत्र के अन्तर्गत 734 अऊ सामुदायिक वनाधिकार पत्र के अन्तर्गत 279 संग विकासखण्ड म कुल 1 हजार 013 हितग्राही मन ल वनाधिकार पत्र वितरित करे गए हे। ये प्रकार ले शासन के ये निर्णय के फलस्वरूप तोकापाल राजस्व अनुविभाग म कुल 11 हजार 552 हितग्राही मन ये योजना ले लाभान्वित होए हें।