बीजापुर ले कुशल चोपड़ा, बीजापुर जिला के शिक्षा व्यवस्था ल लेके माओवादी मन ह सासन कोति ले लापरवाही बरते के आरोप लगात छात्र-छात्रा मन बर प्रेस विज्ञाप्ति जारी करे गए हे।
माओवादी मन ह प्रेस विज्ञप्ति म कहे हे कि जिला के शिक्षा व्यवस्था के नाम ले जिला के सबो स्कूल मन ल निजीकरण करे के संग भगवाकरण करे म लगे हे। अंदरूनी क्षेत्र के स्कूल म एके शिक्षक हे वो शिक्षक ल घलोक पोटा केबिन अधीक्षक बनाके दुनों जगा के प्रभार म नियुक्त करत हे।
जिला के नयापारा तुमनार स्कूल म एक शिक्षक रहिस जऊन ल अधीक्षक बनाय गीस, जेखर चलते स्कूल म शिक्षक नइ हे, स्कूल मन म लइका नइ आवत हे कहि के निजी हाथ म देहे के बात कहे जात हे।
माओवादी मन ह आगू लिखे हे के आश्रम अऊ पोटाकेबिन म शिक्षक ल अधीक्षक नइ बनाना चाही उँहा अलग से अधीक्षक के भर्ती होना चाही। आश्रम अऊ पोटा केबिन के अधीक्षक मन के चलते शिक्षा व्यवस्था चरमरा गए हे।
जिला शिक्षा विभाग के अधिकारी मन उपर आरोप लगात कहे गए हे कि जऊन स्कूल मन म शिक्षक के ट्रांसफर होय हे उहां के शिक्षक मन ल बिना रिलीवर के स्कूल मन ल छोड़ देहे गए हे, जेकर सेती स्कूल मन म शिक्षक नइ हे।एसनाहे आउटसोर्सिंग के सेती स्थानीय युवा मन ल बेरोजगार हे।
राज्य सरकार के ऊपर आरोप लगात कहे गए हे कि बेरोजगार मन ल रोजगार देबो केहि के ये सरकार सत्ता म आये हे फेर अभी तक बेरोजगार मन बर कुछ काम नइ करे हे। ये सरकार सिरिफ मीडिया के आगू अवाज उठाए के काम करत आत हे। शिक्षाकर्मि, अनुदेशक, प्रेरक, आंगनबाड़ी कार्यकर्ता अउ सहायिका मन के जिंदगी कठिन होत जात हे। संगेच पुलिस प्रशासन के ऊपर घलोक आरोप लगात कहे गए हे कि छात्र मन ले बिना पूछताछ करे नक्सली मन के सहयोगी बताके पुलिस ह उमन ल जेल म ठूस देवत हे।
ए सबो समस्या मन ल लेके माओवादी मन कोति ले छात्र छात्रा मन ले अपील करे गए हे कि जिला म स्कूल म एकल शिक्षक, भवन विहीन, सुविधा विहीन अउ शिक्षक विहीन होत जात हे। जेखर बर सबो छात्र छात्रा मन ल अपन समस्या हल करे बर संघर्ष के रद्दा अपनाना चाही तभी निजीकरण अऊ भगवाकरण ले शिक्षा ल मुक्ति मिलही। ये प्रेस नोट संयुक्त्त छात्र संघ ह जारी करके मांग करे हे कि शिक्षा म गुणवत्ता लाये जाए अऊ गांव अउ पंचायत मन म ही स्कूल संचालित होना चाही।