बालोद, मुख्यमंत्री श्री विष्णु देव साय बालोद जिला के संबलपुर गांव म आयोजित कोसरिया मरार समाज के युवक-युवती परिचय सम्मेलन अऊ शाकंभरी महोत्सव म सामिल होइन। उमन कहिन के शिक्षा कोनो समाज अऊ राष्ट्र के उन्नति के सबले मजबूत आधार हे, ते पाए के हरेक परिवार ल अपन लइका मन ल उच्च शिक्षा देहे के संकल्प लेना चाही।
मुख्यमंत्री ह शाकंभरी माता, भगवान श्रीराम, ज्योतिबा फुले अऊ सावित्रीबाई फुले ल नमन करत मरार समाज ल धरती माता के सेवा करइया मेहनतकश समाज बताइन। उमन समाज के सामूहिक विवाह आयोजन अऊ मेल-मिलाप जइसे कार्यक्रम मन के सराहना करिन, जेन एकता अऊ सहयोग के भावना ल बढ़ात हे।
श्री साय ह नशामुक्त समाज के अपील करत कहिन के नशा समाज के प्रगति म सबले बड़े बाधा हे। उमन कहिन के मरार समाज खेती-किसानी अऊ सब्जी उत्पादन के माध्यम ले न केवल आत्मनिर्भर हे बल्कि राज्य के अर्थव्यवस्था म घलोक योगदान देवत हें।
मुख्यमंत्री ह बताइन के सरकार किसान मन के हित म 3100 रुपिया प्रति कुंटल के दर ले धान खरीदी करत हे अऊ सिंचाई, पशुपालन संग दलहन-तिलहन उत्पादन ल बढ़ावा देहे खातिर ठोस कदम उठावत हे।
ए बेरा म उमन युवक-युवती परिचय पुस्तिका के विमोचन करिन अऊ नवविवाहित दंपत्ति मनल आशीर्वाद दीन।
शिक्षा ले ही समाज के सशक्त भविष्य – मुख्यमंत्री साय ह कहिन, मरार समाज करत हे प्रदेश के प्रगति म अहम योगदान
